Төрийн албан хаагч, орон сууц санхүүжилтын корпорациас гаргасан урт хугацааны хүү багатай зээлд хамрагдсан хүмүүс, бага дунд орлоготой иргэд, гэр хороололд амьдарч буй газраа чөлөөлж өгсөн иргэд шинэ байрны түлхүүрээ гардлаа. 40 мянган орон сууц хөтөлбөрийн эхний байрны оршин суугчид ийнхүү сар шинийн өмнө шинэ байрандаа орсон юм. Засгийн газрын бондын хөрөнгөөр Орон сууцны санхүүжилтын корпорацийн захиалгаар Хан-Уул дүүргийн 10 дугаар хороо, Нисэхт бригдсан 252 айлын орон сууцны эхний ээлжийн есөн давхар 63 айлын хоёр орон сууцны нээлт амралтын өдөр боллоо.

Долдугаар хороолол баригдах газрын төлөвлөгөөнд ороод байгаа гэр хорооллын зарим иргэн тус байранд орлоо. Тэдний төлөөлөл ”Яг ний нуугүй хэлэхэд анхандаа сайн итгэж өгөхгүй л байсан. Өнөөдөр байрныхаа түлхүүрийг гардаж авлаа. Их баяртай байна. Нийт иргэддээ төрдөө итгэж, хийж хэрэгжүүлж байгаа ажлыг нь дэмжин, хамтран оролцохыг уриалж байна” гэлээ.
Эхний есөн оршин суугчийн түлхүүрийг НИТХ-ын дарга Т.Билэгт, Нийслэлийн Засаг дарга бөгөөд Улаанбаатар хотын Захирагч Г.Мөнхбаяр, хотын болон ОССК-ын удирдлага гардууллаа. Энэ үеэр Г.Мөнхбаяр “Төр бодлогоо гаргаж, хувийн хэвшил ажлыг нь гйүцэтгэж, банк нь зээлээ олгож, иргэд нь дэмжиж байж ийм үр дүнд хүрч байгаа юм. Өнөөдрийн энэ үйл явдал гэр хорооллыг орон сууцжуулах ажлын эхлэл юм” гэлээ гэж Нийслэлийн хэвлэл, мэдээллийн алба мэдээллээ.