Парламентын шинэ ордон цэцэрлэг сүйтгэхгүй гэсэн яалаа?
Barilga
2019-11-05
Өнөөдрийн Засгийн газрын ээлжит хуралдаанаар Парламентын ордны шинэ барилгын эх загвар зургийг эрхэм сайд нарт үзүүлэх гэж байна. Танилцуулах эзэн нь Засгийн газрын Шадар сайд М.Энхболд. Ордон барих төслөө Шадар сайд Төрийн ордны номын санд өчигдөр хаалттай танилцуулжээ. Цөөхөн хүний нүдэнд туссан тэр зураг одоогоор их л нууц эд гэнэ. Тэнд ордон барихдаа тулбал Монгол төрийн Тамганы хөшөөг гол хаалганыхаа дор “мордуулаад” нэг ч өвс ногоо, мод бут гэмтээлгүй “дүүжин” маягийн, газраас хөндий барилга босгоно гэж байсан ч тэр нууц зургаар бол цэцэрлэгийг бүтэн дүүргэсэн нүсэр ордны төсөл байгаа аж.
Кувейт улсын Засгийн газраас эрхэм гишүүн асан К.Саирааны нэр дээр Монголд Парламентын шинэ ордон барихад зориулж 12 сая ам.долларын тусламжийг бэлэг хэмээн өгснөөс хойш дөрвөн жил гаруйн хугацаа өнгөрчээ. Ордон ч сураггүй, эрхэм К.Саираан ч мөнөөх Кувейт улсдаа Монголыг төлөөлөх анхны элчингээр суухаар одов. Шинэ ордон барих газар олдохгүй тэвдсээр ийнхүү хэдэн жилийг элээсэн юм. Тэр нь бас намтар түүхтэй. Кувейтээс бэлэглэсэн 12 сая ам.доллараар ордон босгуулахаар ордны арын цэцэрлэгт хүрээлэнг сүйтгэхээр төлөвлөж, Их Тэнгэрийн амыг хол гэж гоочилж, Хүүхдийн урлан бүтээх төвийн арыг намагтай хэмээн голсон. Тэгснээ Тагнуулын ерөнхий газрыг нүүлгэж орон дээр нь ордон залахаар товлоод чимээ алдарсан. Даварна даварна гэхэд Тагнуулын газраа хөөж буурийг нь эзлэх гэж байх уу. Нөгөө үндэсний аюулгүй байдал ч яалаа. Тагнууулын ерөнхий газрыг буулгаж парламентын ордон бариад зогсохгүй тэр хавийн бүх газрыг эдлэндээ оруулан гартаа авахаар сэм ярилцаж бас үзсэн. Төрийн тусгай албан хаагчдын эмнэлгийг нурааж Толгойт тийш нүүлгээд буурин дээр нь ордноо өргөтгөн барих л гэнэ. Хууль зүйн үндэсний төвийг парламентын судалгаа шинжилгээний төв болгож, Үндэсний түүхийн музейг парламентын түүхийн музей, номын сан болгоно гээд бүхэл бүтэн эдлэнгийн төлөвлөгөөг хийсэн. Эрхэм гишүүд цэцэрлэг буулгаж ордон барихыг аюулгүй байдлын үүднээс, Ерөнхийлөгч, Засгийн газраас тусдаа гарч, иргэддээ нээлттэй парламент болохын төлөө гэсэн үгээр халхалдаг юм.
Эцэст нь буцаад Төрийн ордны арын цэцэрлэг дээрээ буух юм бол ямар юмны нь аюулгүй байдал болох вэ дээ. Алхам хүрэхгүй зайд бөөрөө нийлүүлсэн орднуудыг аюул дайрахдаа тулбал адилхан л дайрна. Бас шинэ хуучин орднуудыг газар доогуур холбож “сиамын ихэр” болгох юм гэсэн.
Дэлхийн эртний долоон гайхамшгийн нэг Вавилоны дүүжин цэцэрлэг гэгчээр шинэ зууны гайхамшгийг бүтээж цэцэрлэгийн мод, бутыг гэмтээхгүйгээр газраас хөндий “хөлтэй” ордон барих санаачилгыг сонсохоор Орос ардын үлгэрт гардаг шулмын тахиан хөлтэй байшин маягийн юм санаанд ордог юм. Уг нь тэр санал Ногоон намынхан, УИХ дахь Ногоон эвсэл, иргэдийн эсэргүүцлээр намжсан юм. ИЗН-ынхан бүр мод , сөөг, бутны тоо, үнэлгээг гаргаж УИХ-д өргөн мэдүүлсэн. Өнгөрсөн жил цэцэрлэгийг өндөр улаан хашаагаар тойруулахад иргэд “Одоо л үлдсэн ганц цэцэрлэгээ нурааж Парламентын ордноо барих нь дээ” гэж сэрдсэн ч “Явган хүний зам янзалж байна” гээд өнгөрөөсөн. Мөнөөх бэлгийн мөнгө ч ханш нь унаад өдгөө хөрөнгө нэмэрлэхгүй бол ордон барихад хүрэхээ больсон. Дахиад л төсвөөс тэрбум тэрбумаар нь хөрөнгө гаргаж таарна.
Нэмэрт нь нийслэлд хамгийн сүүлд үлдсэн, энгийн хүн хөл тавих эрхгүй болоод хоёр жил болж буй ганц цэцэрлэгт хүрээлэн эрхмүүдийн ордны суурь болж бүрмөсөн сүйрэх цаг ирлээ.
kaka.mn