Төр барилгын салбарын үйл ажиллагааг дэмжих зорилгоор ЗГ-аас 4000 төрийн албан хаагчийг орон сууцаар хангах тогтоолыг баталж, төрийн албан хаагчид болон барилгын компаниудыг баярлуулсан. Гэвч ЗГ-ын тогтоолын хэрэгжилт тун муу явагдаж байна. Эхэндээ ЗТБХБЯамны сайд Х.Баттулга, ОССК-ийн гүйцэтгэх захирал Алдаржавхлан нар 1 м2 нь 650,000 төгрөг гэдэг бол зээлжих эрх гэж ярьж байсан боловч эцсийн шийдвэрээр 1 м2 орон сууцны үнэ 650,000 м2-аас хэтрэхгүй гэсэн нь олон бизнес эрхлэгчдийг шоконд оруулж, төрийн албан хаагчдыг баярлуулсан байх. Энэхүү тогтоол нь барилгын компаниудыг дэмжиж байгаа харагдавч, банкуудын өрийг барагдуулахад чиглэсэн, төрийн албан хаагчдыг хямд орон сууцтай болгох зорилго нь давамгайлжээ.

“Орон сууц 4000” онлайн үзэсгэлэнд оролцож байгаа компаниудад 400 гаруй захиалга ирсэн боловч, үнийн шалгуурыг даваагүй тул борлуулалт муу байна. Төрийн албан хаагчид байр авах хүсэл байвч барилгын компаниудаас улсын комисс хүлээн авсан, банкинд зээлтэй байх шалгуурыг хангаж байгаа боловч 1 м2-ийн үнэ 650,000 төгрөг байх шалгуурыг хангах компани бараг байхгүй байна. Цөөн 650,000 төгрөгийн үнэтэй байрнууд нь хотын захад, байрлал орчин муутай байрнууд байна. Хүссэн байршил орчиндоо авах боломж байхгүй.  Хүссэн байраа авахын тулд төрийн албан хаагч болон барилгын компаниуд 2 гэрээ хийх болж байна. Худалдах худалдан авах жинхэнэ гэрээ, ОССК-аас зээл авах 1м2-ийг 650,000 төгрөгөөр тооцсон хуурамч гэрээ гэсэн 2 гэрээтэй болж байна. Зээлийн эдийн засагчид хуурамч гэрээ ирсэнээр эрсдэлийг буруу тооцож, зээл олгосоноор эрсдэлийг төр үүрнэ.

Хэрэв 1 м2-ийн үнийг 650,000 төгрөгөөс хэтрэхгүй гэсэн заалтаа эргэж харахгүй бол ЗГ-ын тогтоол хэрэгжихгүйд хүрч, хуурамч гэрээнүүд байгуулагдах нь тодорхой болж байна.

Засгийн газар тогтоол барилгын салбарын үйл ажиллагаанд дэмжлэг болж чадсангүй. Харин ч хүмүүст хүлээлт бий болгож, хоосон горьдлого төрүүллээ.

Орон сууцны үнийг бууруулья гэвэл газар болон дэд бүтций нь төрөөс үнэ төлбөргүй шийдэж өгвөл 1 м2-ийн үнийг хүссэн 650,000 төгрөгтөө багтаах бүрэн боломж байна.

Орон сууцны зах зээлд эрэлт их байгаа боловч худалдан авах чадвар муу байна. Банкууд орон сууцны зээлийнхээ хүүг бууруулчихвал, барилга сэргэх бүрэн боломж байна.

Сүүлийн үед иргэд дуусаагүй барилгад захиалга өгөх нь эрс багасч, харин ашиглалтанд орсон байрыг худалдан авах нь эрс нэмэгджээ. 2009 онд 7500 гаруй айлын орон сууц ашиглалтанд орсоноос 6000 нь эзэнтэй болжээ.