Баянзүрх дүүргийн VII хорооны нутаг дэвсгэрт байрлах нэг хоёрдугаар байрны 432 айлын дулааны шугам өнгөрсөн мягмар гаригт хагарч гэмтэл учирснаар халуун хүйтэн ус нь хаагдсан байна.

Үүнтэй холбогдуулан "ОСНААУГ"-ын ерөнхий инженерээр ахлуулсан зургаан хүнтэй аваар техникийн бригад болон холбогдох албан байгууллагын мэргэжилтнүүд шугам сүлжээг засахаар ажиллаж байгаа аж.

Хэдийгээр дээрх мэргэжилтнүүд найман метрийн гүнд хагарсан шугам сүлжээг засаж, ус алдахыг зогсоосон боловч дахин өөр газраас ус алдаж эхэлсэн байна. Тиймээс аврагчид өнөөдрийг хүртэл дээрх газруудад үргэлжлүүлэн ажиллаж байгаа гэнэ.

Үүний зэрэгцээ тус байруудад Ус суваг усжуулалтын газраас хоёр ус машин ус түгээн иргэдэд үйлчилж байгаа аж.

Г.Долгорсүрэн