Үе үеийн парламентаар домог мэт хөвөрдөг яриа бол шинэ төрийн ордонтой болох тухай асуудал юм. Тиймээс Д.Дэмбэрэл даргын ангийнхан олон жил сунжран яригдсан уг асуудлыг иргэний зориг гарган нэг мөр шийдвэрлэхээр УИХ-ын дэд дарга Г.Батхүүгээр ахлуулсан ажлын хэсэг томилоод буй.

Харин тус ажлын хэсгийнхэн дүн өвлийн хүйтнээр УИХ-ын чуулганаас завсарлага авч шуурхай хуралдан хаврын урь золгохтой зэрэгцэн шинэ ордны барилгын ажлыг эхлүүлэх шийдвэр гаргаж байсныг тодхон санаж байна. Гэхдээ энд нэг зүйлийг тодруулахад, гишүүдийн олонх нь тухайн үед шинээр баригдах ордонг одоогийн Засгийн газрын ордны хойт талын цэцэрлэгт хүрээлэнд ногоон байгууламжийг нь эвдэхгүйгээр барихыг ерөнхийдөө дэмжиж байсан.

Тэгэхээр бодит байдал дээр цэцэрлэгт хүрээлэнгийн бут, сөөг, модыг зайлуулж байж л байшин барих зай завсар гарах нь хэнд ч ойлгомжтой. Цаашлаад, нийслэлийн агаарын бохирдол гамшгийн хэмжээнд хүрчихээд буй ийм цаг мөчид холбогдох эрх мэдэлтнүүд өөрийн санаачлагаар хүрз шороо шидэж, ганц ширхэг мод тарих ухамсаргүйгээс хойш байгааг нь сөнөөж, бусниулах нь зүйд нийцэхгүй.

Хамгийн гол нь эрх баригчдын энэ шийдвэр нийслэлд үлдсэн бараг цорын ганц гэж хэлж болох ногоон байгууламжийг устгах төлөвлөгөө юм.

Өөрөөр хэлбэл, хүн амын төвлөрөл өдрөөс өдөрт нэмэгдэж буй ийм үед цэцэрлэгт хүрээлэнгээ устгах нь харалган бөгөөд цөөн хэсэг албан тушаалтны эрх ямбын төлөө олон нийтийн эрх ашгаас урвасан үйлдэл билээ. Тэгээд ч энэ хэмжээний ногоон байгууламжийг дахин цогцлооход наад зах нь 50-70 жил хэрэгтэй гэдгийг эрх дархтанууд мэдмээр юмсан.

Гэхдээ энд таатай гэмээр нэг зүйлийг дуулгахад, иргэний гэх тодотголтой нэр бүхий хөдөлгөөн болоод Иргэний зориг нам тус цэцэрлэгт хүрээлэнг хамгаалалтад авч, олон түмний эрх ашигт үл нийцэх шийдвэрээсээ нэн даруй татгалзахыг эрх баригчдаас шаардаж эхэлжээ.

Уг нь ойрын хэдэн жилдээ шинэ ордон барихгүй бол төрийн ажил зогсчих гээд байгаа биш. Төр, засгийн өндөрлөг, УИХ, Засгийн газрын гишүүд болоод бусад албаны хүмүүс одоогийнхоо сууж буй албан өрөөнд ажлаа үргэлжлүүлэн хийхэд болохгүй зүйл үгүй шүү дээ. Харин төрийн ордон барихаар зэхэж буй Кувейтээс манай улсад өгсөн 12 сая ам.доллараар наанадаж, алслагдсан дүүргийн ачааллаа дийлэхгүй дэнжигнэж буй сургуулиудад ядаж өргөтгөл барьж өгвөл хэдэн үеэрээ сайшаах ажил хэрэг болох юм.

Түүнчлэн одоогийн Засгийн газрын ордны зүүн гap талд байрлаж буй хуучин хэвлэх үйлдвэрийн суурин дээр шинэ ордноо сүндэрлүүлэх талаар түшээд нэг хэсэг нэлээд даацтай ярьж байсан. Гэтэл эрх баригчид гэнэт яагаад ногоон байгууламжаа сөнөөж, ордон барих шийдвэр гаргав. Харин энэ бүхний цаана экс Ерөнхийлөгч Н.Энхбаярын нэр дуулдах боллоо.

Учир нь эрхэм ноёнтон төрийн данстай хэвлэх тус үйлдвэрийг газрын зөвшөөрлийнх нь хамт хувьчлан авсан юм байх. Уг нь тус үйлдвэр нь ордны эзэмшил юм. Тиймээс энэ талаар холбогдох албаны хүмүүсээс тодруулахад, хариулт хэлэх хүн байсангүй. Тэгэхээр удахгүй нэг л өглөө төрийн ордон ч гэсэн хувьчлагдах юм байна л даа...

О.Сэлэнгэ