Барилга, хот байгуулалт, төлөвлөлтийн газрын урилгаар ОХУ-ын Эрхүү хотын Техникийн их сургуулийн проректор А.К.Комаров тэргүүтэй төлөөлөгчид Улаанбаатар хотод айлчлал хийж байна. Айлчлалын үеэр хоёр тал хамтын ажиллагааны төрлүүдийг хэлэлцэн санамж бичигт гарын үсэг зурлаа. Өндөр барилгуудыг газар хөдлөлийн норм дүрэмд нийцүүлэн төлөвлөх аргачлалыг дадлага туршлагатай мэргэжилтэн, тэргүүлэх багш нараар заалгах, сургалт семинар зохион байгуулах үр өгөөжтэй туршлага, хамтын ажиллагааны аливаа мэдээллийг тухай бүр харилцан солилцож байхаар болжээ.

Мөн барилга байгууламжид газар хөдлөлийн тэсвэрлэлтийн магадлал хийх, барилгын үндсэн араг бүтцэд үүссэн ан цав, цууралт, суултыг хэрхэн арилгах болон барилгын дэвшилтэт технологийн талаар туршлага солилцоно. Айлчлалын бүрэлдэхүүнд “Иркутсктрой инвест” компанийн дэд захирал Сарсенов Сергей Владимирович багтжээ. Тус компани нь галд тэсвэртэй, нордоггүй барилгын материалаар “таун хаус”-ууд барьсан туршлагатай компани аж. Байшингийн карказыг төмрөөр хийж, 15-30 жилийн хугацаатай Швейдийн эрэг боолтоор боодог гэнэ. Тухайлбал, гадаа 30 хэмийн хүйтэн байхад хоёр давхар 96 ам дөрвөлжин талбайтай сууцыг хоногт зургаан кВтын эрчим хүчээр 18 хэмийн дулаантай байлгадаг аж. Мөн хуучин барилгыг сэргээн засварладаг. Тухайлбал, угсармал орон сууцыг сэргээн засварлахдаа суурь, ханыг бэхэлж, дулаалахдаа ч давхар бэхэлдэг аж.

Баригдсан барилгууд найман баллын газар хөдлөлтөд тэсвэртэй гэдэг ч 12 баллын газар хөдлөлтийг тэсвэрлэж чадах юм.

Тус компанийн технологиор барилга барихаар Эрдэнэт хотод дөрвөн га газрын зөвшөөрөл авч ажлаа эхлүүлэх гэтэл эдийн засгийн хямрал болохын зэрэгцээ дээрх хотын ОХУ-ын хөрөнгө оруулагчид өөрчлөгджээ. Үүнээс болж одоог хүртэл барилга угсралтын ажил хойшлогдсон байна. Дээрх компанийн хямд, дулаан алддаггүй байшин Герман улсын өндөр шалгуурт тэнцэж дэлхийн аль ч улсад байшин барих зөвшөөрөлтэй болжээ. Тиймээс манай улсад барилга барих судалгаа хийж яваа аж. Өнөөдөр Улаанбаатар хотоор явж цууралт өгсөн, араг бүтцэд ан цав гарсан барилгуудтай танилцаж, барилга байгууламжид газар хөдлөлийн тэсвэрлэлтийн магадлал хийх аж.

ОХУ-ын Техникийн их сургууль есөн тэнхимтэй барилгын бүх чиглэлээр мэргэжилтэн бэлтгэдэг. Хамтын ажиллагааны санамж бичгийг үзэглэснээр оюутнуудыг сургах боломж нээгдэж байна. Мөн барилгын чиглэлээр өмнө нь сурсан хүмүүсийг сургуулийн харьяа Давтан сургалтын төвд суралцуулах аж.

Б.Мягмансанж