Гэр хороолол гэхээр  хог, шороо хийссэн ахуй ихэнхдээ угтдаг бол тэр орчинд бүхэл бүтэн цэцэрлэгт хүрээлэн байгуулсан айл өрх ч  нийслэл хотод  цөөнгүй байна. Сүхбаатар дүүргийн 17 дугаар хорооны нутаг дэвсгэр Дамбадаржаад байх энэ айл  ажилсаг гэр бүл болохоо үүднээсээ л шуудхан илтгэв. Цэлгэрхэн хашаан дотор нүнжиг заасан хауз бариад зогсохгүй нүд унагах гол зүйл нь  Н.Батсүхийн хашаан доторх цэцэрлэг байсан юм.  Нийслэлийн 71 дүгээр дунд сургуульд слесарь ажилтай шавилхан залуу 20-иод жил ноцолдож байж энэ бүхнийг өнөөгийн түвшинд хүргэснээ хэллээ.

Тэдний хашаанд 7-8 төрлийн жимсний мод ургаад зогсохгүй өнгө, үнэрээрээ арааны шүлс асгаруулж байлаа. Давжаа алим л гэхэд  идэхэд аль хэдийнэ бэлэн болжээ. Харин чацарганаа хураах арай болоогүй гэж гэрийн эзэн дуулгалаа.  Н. Батсүхийн хашаанд  чавганы мод ч  ургаж  байна.  Тарьсан мод бут нь бүгд эмх цэгцтэйн дээр хашаан дотор ургасан зүлэг нь гишгэхэд ч   хайрламаар байв.  Ийм сайхан орчинг ажилсаг гараараа бий болгосон залуу явган хүн явах замаа толийтол нь цардчихжээ.  Орой үдшийн цагаар гэр бүлээрээ  нарлан суух сүүдрэвч  нь хүртэл янзтай.  Сүүдрэвч рүү очих замд жижиг модон гүүр барьж  хиймэл цөөрөм хүртэл байгуулжээ. 

 Ерөөсөө тэр чигээрээ диваажин бүрдүүлж чадсан энэ залууг дуурайгаад  хөршүүд нь ч бас хашаа хороогоо тохижуулж эхэлсэн гэнэ.  Манай энэ хавьд хашаан дотроо цэцэрлэгт хүрээлэн байгуулсан айл олон бий гэж даруухан өгүүлсэн Н. Батсүхэд Нийслэлийн засаг даргын нэгдүгээр орлогч Б. Баатарзориг дурсгалын зүйл гардууллаа.  Тун удахгүй нийслэлийн ойн өдөр болно.  Энэ ойд нийслэлчүүдийн зүгээс барих гол бэлэг бол орчноо тохижуулах явдал юм.  Хотын хөгжилд иргэдийн оролцоо юу юунаас чухал.  Амьдарч байгаа орчноо танайх шиг болгоод явчихвал үнэхээр бахархмаар сайхан гэж Б. Баатарзориг дарга тэднийхийг магтлаа.

Биднийг хашаан доторхи цэцэрлэгтэйгээ танилцуулсан дараагийн айл нь Сүхбаатар дүүргийн 16 дугаар хорооны иргэн Ч. Эрдэнэчулууных байлаа. Гэр хорооллын орчин ахуйг сайжруулах Хабитат төсөл дээр ажилладаг гэдгээ энэ гэрийн эзэн хэлээд цэцэрлэгээ танилцуулсан юм.  Эдний хашаан дотор Монгол  оронд ургадаг 20 гаруй төрлийн жимсний мод бүгд бий гэнэ.  Дээр нь өнгөрсөн жил ургах эсэхийг нь туршиж үзэхээр   Унгар алимны мод тарьжээ.  Эрдэнэчулууны аав нь давжаа алим тарихад бүхий л амьдралаа зориулсан нэгэн байсан тухай хуучиллаа.  Тийм болохоор аавынхаа үйл хэргийг үргэлжлүүлж яваа юм байна.  Ургацаа  хураагаад авчихсан гээд бид бүхнийг арнетек буюу давжаа алимаар исгэсэн жимсний жүүсээр дайлав.  Гэхдээ л тэдний хашаан дотор хурааж  аваагүй жимс энд тэндгүй бөнжийж харагдсан. Байгалийн хишгийг байгальд нь зориулах ёстой. Шувуунууд идэг л дээ гэж өгөөмөр загнасан Ч. Эрдэнэчулуун өөрийнхөө байгуулсан цэцэрлэгийг байгаль талдаа илүү гэж тодорхойллоо.