Гэр хорооллын иргэдийг чанар, стандартад нийцсэн ундны усаар хангах, амьдралын чанарыг дээшлүүлэх зорилгоор Улаанбаатар хотын Нийтийн аж ахуйг сайжруулах (УБ-НААСТ2) хоёр дахь төслийн хүрээнд Чингэлтэй, Дарь-Эх, Дамбадаржаа, Баянхошууны 4 гэр хороололд ус хангамжийн системийг цогцоор нь барьж байгуулаад байна.

БАЯНХОШУУ-ны ус хангамжийн систем нь Улаанбаатар хотоос 45 км-ийн зайд орших “Дээд эх үүсвэр”-ээс тэжээгддэг бөгөөд Баянхошуу өмнөд, Баянхошуу хойд гэсэн 2 хэсгээс бүрддэг.

Өмнөдийн хэсэг нь “Ханын материал” орчим буюу СХД-ийн 5, 6-р хорооны нутаг дэвсгэрт болон түүний ойр орчимд орших айл өрх, албан байгууллагыг ундны усаар хангана.   Хойд хэсэг нь СХД-ийн 7,8,9,10,11,25-р хорооны нутаг дэвсгэрт ажиллаж амьдарч байгаа хүн ард, албан байгууллагыг ундны усаар хангах зориулалттай. Газар нутаг нь уулархаг, гүвээ толгод ихтэй учраас ус хангамжийн сүлжээнээс шууд хангах боломжгүй тул 2 цагираг систем болгон дээд, доод гэж нэрлэсэн:

Баянхошууны усан хангамжийн өмнөд, хойд систем нь дараахь барилга байгууламжаас бүрдэнэ.

39.48 км ус дамжуулах шугам хоолойг суурилуулсан. Хүчитгэсэн хуванцар яндан хоолой, зөөлөн ширмэн хоолойг ашиглаж хийсэн тул эдэлгээ удаантай, гөлгөр гадаргуутай тул ус саадгүй урсана, зэврэлт өгөхгүй зэрэг давуу талуудтай. 

Цагт 600-800м3 ус шахах хүчин чадал бүхий 2 насос станц; Энэ насос станцад нийтдээ 9 насос суурилагдсан ба бүгд алсын удирдлагыг системд холбогдсон. Ингэснээрээ даралт, зарцуулалт, температур болон бусад дохиоллын мэдээллүүдийг УСУГ-ийн диспетчерт шууд дамжуулдаг.

500мі-ийн багтаамжтай доод усан сан. Энэхүү усан сан нь дугуй хэлбэртэй бөгөөд ундны усанд зориулагдсан тусгай зориулалтын тусгаарлалтын материалаар доторлогоо хийгдсэн.  Баянхошууны өмнөд болон хойд доод системийн 26 УТБ-ыг усаар хангана.

1500мі-ийн багтаамжтай дээд усан сан. Баянхошууны гэр хорооллын хойд-дээд хэсэгт байрласан 26 УТБ-ийг усаар хангана.

Шинээр 27 УТБ-ийг барьж байгуулсан ба засварласан УТБ-тай нийлээд нийт 52 УТБ-ийг ус хангамжийн төвлөрсөн системд холбосон.

Ус хангамжийн системд 67, 76, 105-р сургууль, 117, 127-р цэцэрлэг, Эрүүл мэндийн 8,14-р төв, халаалтын байр зэрэг 8 байгууллага холбогдож байгаа юм.

Төслийн ач холбогдол:

Ус хангамжийн төвлөрсөн системд холбогдсоноор:

Чанар, стандартад нийцсэн ундны ус хэрэглэснээр уснаас үүдэлтэй өвчлөл буурна

УТБ-ууд шугамд холбогдсон байнгын устай болсноор удаан хугацаагаар ус нөөцлөх шаардлагагүй болно. Энэ нь эрүүл амьдрах, амьдралын чанараа дээшлүүлэх боломжийг бүрдүүлнэ.

Хүүхэд, хөгшид, эмэгтэйчүүд усны машин хүлээхэд зарцуулдаг байсан цаг хугацаагаа өөрийгөө хөгжүүлэх болон бусад зүйлд зарцуулдаг болно.

Гэр хороололд дэд бүтцийг бий болгосноор иргэдийн өмчлөлд байгаа газрын зах зээлийн үнэ өснө.

Ирээдүйд амины орон сууцны хороолол болон хөгжих нөхцөл боломж бүрдэнэ.
Ус хангамжийн системийн бүдүүвч

Шинэ техник технологийг нэвтрүүлсэн нь

Энэхүү системд хүйтний улиралд тэсвэрлэх чадвар сайтай, зэвэрдэггүй дулаалгатай хүчитгэсэн хуванцар яндан хоолой, зөөлөн ширмэн хоолой, холбох хэрэгсэл, цахилгаан соронзон мэдрэгч бүхий усны тоолуур, эрчим хүчний хэмнэлттэй насос тоног төхөөрөмжүүд, даралт, урсац тохируулах хяналтын хаалтууд зэрэг дэлхийн зах зээл дээр хэрэглэгдэж байгаа дэвшилтэт техник технологийг нэвтрүүлж суурилуулсан.

Эдгээр шинэ техник тоног төхөөрөмжийг УСУГ-ын ус хангамжийн алсын удирдлагын системд холбож өгснөөр ашиглагч байгууллагын цахилгааны болон хүн хүчний зардлыг бууруулах, усны алдагдал гэмтлийг богино хугацаанд олж илрүүлэх, ус хангамжийн горимийг хэвийн байлгах гэх мэт олон талын ач холбогдолтой болсон. Энэхүү ус хангамжийн систем бүрэн ашиглалтад орсноор БАЯНХОШУУ гэр хорооллын өмнөд хэсэгт 299 га талбай, хойд хэсэгт 770 га талбайд оршин сууж буй 250 000 иргэдийн эрүүл таатай орчинд амьдрах нөхцөл бүрдэж байгаа юм.

Зохиогч, Зөвлөх, Гүйцэтгэгч байгууллагууд