Нийслэлийн Иргэдийн Төлөөлөгчийн Хурлыг дарга Т.Билэгт, Нийслэлийн Засаг даргын Нэгдүгээр орлогч Б.Баатарзориг болон бусад дүүрэг харьяа байгууллагын удирдлагууд Баянзүрх дүүргийн тохижилт бүтээн байгуулалтын ажилтай танилцлаа. Баянзүрх дүүргийн хувьд 24 хороо, 260000 хүн амтай, 68000 айл өрхтэй нийслэлийн томоохон  дүүрэг билээ.

2010 оныг Баянзүрх дүүрэг хөрөнгө оруулалт, хөгжлийн жил болгон зарласан. Үүний хүрээнд төр захиргааны нэгдсэн байртай болж байгаа юм. Байрны завсарын явцыг нийслэлийн удирдлагуудад танилцуулаад, ажлын явц 70 хувьтай байгааг хэллээ.

Үүний дараагаар Монгол Зөвлөлтийн найрамдалт харилцааны нотолгоо болсон “Монгол ард” Эскадрилын хөшөөг шинэчлэн зассан ажилтай танилцлаа. “Монгол ард” Эскадрилын хөшөө нь Монголд анх удаа нисэх онгоц буусан газрын талбай дээр сүндэрлэж байдаг цэлмэг тэнгэр өөд тэмүүлж буй 3 онгоц бүхий хөшөөг 1985 онд дурсгал болгон байгуулсан түүхтэй юм. Цагийн эрхээр хуучирч муудсан хөшөөг иргэд хөдөлмөрчдийн амарч зугаалах таатай бүс болгох ажлыг зохион байгуулж, нийслэл дүүргийн хөрөнгө оруулалтаар 42 сая төргөгийн засварын ажил хийж тохижуулжээ.

Тус дүүрэг Жуковын хөшөөний хойно  усан оргилуур бүхий амралт чөлөөт цагийн цогцолбор байгуулснаар иргэд бас нэгэн амрах газартай болсон энэ. Уг цогцолбор хоёр салангад усан оргилуураас бүрдэж, өвөрмөц шийдэл бүхий хэв маягийг агуулсан хийц загвартайгаараа онцлог.  Усан оргилуур эргэн тойрондоо гэрэлтүүлэгтэй, хүүхэд хөгшид нарлах саравч, сандал, цэвэр цэмцгэр байдлыг хангах үүднээс хогийн савыг байрлуулжээ. Дараа нь Баянзүрх дүүргийн 3-р хороо Сансар үйлчилгээний төв дунд усан оргилуур бүхий амралт чөлөөт цагийг өнгөрөөх цогцолбортой танилцлаа. Ийнхүү иргэдийн амьдрах орчин нь өнгө үзэмжтэй болсонд оршин суугчид талархаж байгаагаа нийслэл болон дүүргийн удирдлагууд илэрхийлж байлаа.

БЗД-ийн жил бүр өөрийн гэсэн байргүй хороодоо цогцолбор байртай болгодог бөгөөд энэ удаад 18-р хороог шинэ цогцолбортой болгосон байлаа. Ингэснээр иргэддээ нэг цэгээс хүндрэл чирэгдэлгүй шууд үйлчилж байгаа юм. “Манай дүүрэгт есөн хороо байргүй байгаа. Тэднийгээ байртай болгох зорилготой” хэмээн тус дүүргийн Засаг дарга Б.Батзориг танилцууллаа. Харин нийслэлийн талархлын өдрийг угтаж “Хашаа” арга хэмжээний хүрээнд 18-р хороонд зөвшөөрөлгүй барьсан 22 контенерийг нүүлгэн шилжүүлж, түүний оронд 1000 м талбай дээр бичил цэцэрлэг байгуулсан нь тун ч содон байв. Бүтээн байгуулалтын ажилтай танилцах үеэр Хотын орлогч хэлэхдээ, энэ жил тохижилтын ажлын хүрээнд 198 тэрбум төгрөгийг төсөвлөн гаргасан. Үүнийгээ хэрхэн ажил хэрэг болгож байгааг дүгнээд зогсохгүй дараа жил юу хийхээ төлөвлөн мөн бусад дүүргийн удирдлагуудад үлгэр дууриалал болгон авах зүйл олон байгааг харуулах зорилготой юм. Иргэдийнхээ санал санаачилгад тулгуурлан иргэдэд ээлтэй тэдэнрүү чиглэсэн олон ажлыг санаачлан иж бүрнээр нь хийж, ийм зүйл хийснээ харуулж байгаа нь цаашид улам ихийг хийнэ гэдгийн баталгаа боллоо хэмээлээ.