Миний, чинийдээ хvрсэн нийслэлийн төр захиргааныхан болоод “Гранд плаза” худалдааны төвийн хооронд өрнөсөн авто машины зогсоолын газрын маргаан савнаасаа халив бололтой. Хvн ам ихээр төвлөрсөн нийслэлд хэдэн гол замынх нь ачаалал хэрээс хэтэрч байгаа учраас баруун дөрвөн зам буюу “Гранд Плаза”-гийн өмнөх замыг өргөтгөхөөр нийслэлийн Авто замын газраас шийдвэрлэсэн аж. Энэ дагуу тус худалдааны төвийн 40 машины авто зогсоолын талбайг багасгах шаардлагатайг нь нийслэлийн Газрын албанаас дуулгаж, газар чөлөөлөхийг хvсч.

 

Гэвч худалдааны төвийнхөө интерьертэй зохицуулан хоёр тэрбум гаруй төгрөгийн тохижилт хийсэн учраас “чадахгvй” гэдгээ Гранд Плаза худалдааны төвийн захиргааныхан хэлж байна. Учир нь, тус худалдааны төвийн зураг төлөвлөгөө нь 2005 онд гарахад “ок” гэж толгой дохин барилга барихыг нь хотын ерөнхий менежер зөвшөөрчихөөд өнөөдөр зам өргөтгөх нэрээр хvний өмчид дураараа халдах гэж байна. Нөгөөтэйгvvр, ирээдvйд хvн ам ингэж өсөөд, автомашины тоо тэд хvртэл нэмэгдэнэ гэсэн урьдчилсан тооцооллоо зөв гаргасан бол алга дарам газрын төлөө ийм зарга vvсэхгvй байсан. 2-3 жилийн л хот төлөвлөлтийн бодлого явуулдгаас өнөөдөр хот, худалдааны төвийнхний дунд ийм асуудал vvсчихээд байна. Хэдийгээр хот газраа мэднэ хэмээн нийслэлийн Засаг даргын орлогч Б.Мөнхбаатар хэлж байгаа ч татвар төлөгч хувийн хэвшлийнхний эрхийг хэн хамгаалах юм.

 

Бидний цалин, орлогоосоо илvvчлэх хэдэн төгрөг ч гэсэн хотын сайн сайхны төлөө зарцуулагддаг л байх хэмээн тус худалдааны төвийн тvрээслэгчдийн төлөөлөл Дашбямба хэлж байв. Газрын маргаанаас болж барилгынхаа зураг төслийг архиваас шvvн vзэхэд аль хэдийнэ засвар орчихсон, авто замыг нь өргөтгөх учраас нөхөн бичилт хийв гэсэн бичигтэй гарчээ. Гэтэл тэрхvv гарын vсэг нь барилга баригдсны дараа 2007 онд зурагдсан байж. Тиймээс газрынхан, авто замынхан хуйвалдсан гэж ч тэд сэжиглэж буй аж. Тус худалдааны төвийн офиссын байрны төлөөлөгч Ганзориг “Хот замаа өргөтгөж болно. Гэхдээ хоёр тэрбум гаруй төгрөгийн тохижилт хийсэн газрыг эвдэллээ гэхэд нөхөн төлбөр хэн олгох вэ. 40 машины авто зогсоолыг 20 болголлоо гэхэд өнөөх хотын “шvдний өвчин” болсон авто машины тvгжрэл vvснэ биз дээ. Явган хvн хаагуур нь явах юм. Ерөөсөө хотод төлөвлөлттэй байшин барьчихаар дараа газрыг нь хумслаад авдаг юм байна” хэмээн бухимдлаа илэрхийлж байв.

 

Гранд плаза төвийн ашиглалт, захиргааны менежер Г.Алтанцэцэг “Vнэндээ авто замыг өргөтгөх зорилгоор авто машины зогсоолоос 50 метр газрыг л авна гэж байгаа ч явган хvний зам, ногоон байгууламж бvгд байхгvй болж байгаа. Дээр нь троллейбусны шугамыг цэгцлэх гэж нэг хэсэгтээ л бужигнана. Vндсэндээ тус худалдааны төвийн гаднах тохижилтыг устгаж орхино. Ямартай ч хотын шийдвэрийг тэд хvлээн авахгvй гэдгээ мэдэгдэж, газраа хамгаалахаар тууштай тэмцэхээр болсон гэдгээ ч анхааруулав.

 

Харин нийслэлийн Газрын албанаас энэ талаар тодруулахад “Засаг даргын орлогч Б.Мөнхбаатар баруун дөрвөн замыг өргөтгөхтэй холбогдуулан газар дээр нь очиж танилцсан. Гэхдээ нэг талыг барьж туйлшралгvйгээр тус худалдааны төвийн ч эрх ашгийг бодолцсон шийдвэр гарга. 14 хоногийн дараа танилцуул гэсэн vvрэг өгсөн. Баруун дөрвөн замын хувьд энэ жил хийх ажлын төлөвлөгөөнд орсон учраас өргөтгөх ажил хийж л таараа. Ямар ч гэсэн тэд нартай зөвшилцөлд хvрэхийг хичээнэ. Харилцан ойлголцож чадна байх” хэмээн найдвар тавьж байгаа гэв. Гэхдээ хоёр тал хэлэлцээрийн ширээний ард суутлаа нэг хэсэгтээ л газрын маргаан нь vргэлжилж, тэр хэрээр баруун дөрвөн замын өртгөтгөлийн засварын ажил ч хойшлох нь. Тендерээс болж оройтдог байсан зам засвар энэ жил газрын маргаанаас болж хийгдэхгvй ч өнжиж болзошгvй нь.