Сонгинохайрхан дүүрэгтээ төдийгүй нийслэлийн хэмжээнд томоохон нутаг дэвсгэр, хүн амтайд тооцогддог Баянхошууны гэр хорооллынхон нийслэлийн цэвэр усны нэгдсэн шугам сүлжээнд холбогдлоо.   Дэлхийн банкны санхүүжилтээр 1997 оноос хэрэгжиж эхэлсэн Улаанбаатар хотын Нийтийн аж ахуйг сайжруулах төслийн хүрээнд эхний ээлжинд Нисэх, Яармаг, Гандан, Дэнжийн мянга, Шархад, Толгойтын гэр хорооллыг 2003 онд цэвэр усны нэгдсэн сүлжээнд холбосон. Харин 2004 оноос гэр хороолол чиглэсэн ус хангамжийг өргөтгөх ажил үргэлжилсээр энэ удаад Баянхошуу, Чингэлтэй, Дарь-Эх, Дамбадаржаа гэсэн 4 гэр хорооллын ус хангамжийг цогцоор нь барьж байгуулах ажлыг гүйцэтгээд байна.

Өнөөдрөөс Баянхошууны оршин суугчдыг ундны усаар тасралтгүй хангах систем бүрэн ашиглалтад орлоо. Ингэснээр Баянхошууны гэр хорооллын өмнөд хэсгийн 299 га, хойд хэсэгт 770 га талбайд оршин сууж буй 250 мянган иргэн эрүүл, таатай орчинд амьдрах нөхцөл бүрдэж, ундны усны гачаалгүй болж байгаа юм. Энэхүү систем нь Улаанбаатар хотоос 45 км-ийн зайд орших цэвэр усны “Дээд эх үүсвэр”-ээс тэжээгддэг бөгөөд газар нутаг нь уулархаг, ус хангамжийн сүлжээнээс шууд хангах боломжгүй тул Баянхошуу өмнөд, Баянхошуу хойд гэсэн 2 цагираг систем болгосон байна. Өмнөд хэсэг нь Ханын материал орчим буюу 5, 6 дугаар хорооны нутаг дэвсгэрийн 26 ус түгээх байр, хойд хэсэг нь 7,8,9,1,11,25 дугаар хорооны нутаг дэвсгэр дэх 26 ус түгээх байрыг усаар хангаж, айл өрхүүдээс гадна албан байгууллагуудад ундны ус нийлүүлнэ. Тухайлбал, 67,76,105 дугаар сургууль, 117,127 дугаар цэцэрлэг, Эрүүл мэндийн 8,14 дүгээр төв зэрэг байгууллагууд тус системд холбогджээ.

Хүйтний улиралд тэсвэрлэх чадвар сайтай, зэвэрдэггүй дулаалгатай хүчитгэсэн хуванцар яндан хоолой, зөөлөн ширмэн хоолой, цахилгаан соронзон мэдрэгч бүхий усны тоолуур, эрчим хүчний хэмнэлттэй насос, урсац тохируулах хяналтын хаалтууд зэрэг дэлхийн зах зээл дэх дэвшилтэт техник технологийг ашигласан усан хангамжийн системийг УСУГ-ын алсын удирдлагатай системд холбож өгснөөр ашиглагч байгууллагын цахилгаан болон хүн хүчний зардлыг бууруулах, алсын гэмтлийг богино хугацаанд олж илрүүлэх, ус хангамжийн горимыг хэвийн байлгах зэрэг олон талын ач холбогдолтой болсон байна.

Усан хамгамжийн системийн нээлтэд Нийслэлийн Засаг даргын нэгдүгээр орлогч Б.Баатарзориг, Дэлхийн банкны Ази, Номхон далайн бүс нутгийн дэд бүтцийн эдийн засгийн үнэлгээ, хяналтын хэсгийн багийн ахлагч Таку Камата болон холбогдох алба, дүүргийн удирдлагууд оролцлоо.