МАХН болон Ардчилсан намынхан том өргөөтэй болохын тулд хэдийнэ ханцуй шамлан ороод байгаа билээ. Тэд хоорондоо өрсөлдөж, нэг нэгийхээ дээр гарах гэж үзэж тардаг нь намын байрны барилга барихад хүртэл давтагдав. Нэгэнт сурсан занг сураар боож болохгүйгээс хойш хоёр хүчин өрсөлдсөөр байх нь мэдээж хэрэг. Тэд ажил, амжилт, албан тушаалаар өрсөлддөг байсан бол бүр сүүлдээ орон байрныхаа хэмжээ, өнгө зүс, хэдэн төгрөгөөр бариулж байгаагаараа өрсөлдөх болов.

МАХН-ын байр хоёр жилийн өмнөх "Долдугаар сарын 1"-ний үймээнийн үеэр шатсан. Тухайн үед намын дарга нь шатаасан байрныхаа өмнө залбиран мөргөж олныг гайхшруулж билээ. Харин олон нийт "Төр засгаа олигтой удирдаж чадаагүйгээс болж ийм явдал болсон болохоос ард түмэн зүгээр нэг дайрч ороогүй" хэмээн нэлээд шүүмжлэлтэй ханддаг. Үнээс хойш МАХН-ынхан шинэ байртай болохын төлөө шургуу хөөцөлдөж эхэлсэн. Хөөцөлдсөнийхөө ч үр дүнд төрөөс санхүүжилт аваад амжсан сүйхээтэй улс. Сохорсон биш завшив гэгчээр шатаалгасан биш шинэ байртай болчихлоо.

МАХН-ынхан шинэ байраа "Тусгаар тогтнолын ордон" хэмээн нэрлэж буй. Энэхүү ордноо босгохдоо тэд гадны ямар ч компаниас мөнгө аваагүй, авах ч шаардлага байхгүй гэдгээ намын генсек хариуцлагатайгаар хэлсэн. Намын шинэ барилгын төсөв 14.7 тэрбум төгрөгийн өртөгтэй байхаар төлөвлөжээ. Харин энэхүү санхүүжилтийг бий болгохын тулд “Голомт" банкнаас зургаан тэрбум төгрөгийн зээл авсан юм. Зээл учир мэдээж эргэн төлөх ёстой. Мөн төрөөс нөхөн төлбөр болгож зургаан тэрбум төгрөг авсан аж. Үлдсэн хөрөнгөө хандив туслалцааны буянаар бүрдүүлсээр байгаа юм. Намаа гэсэн чин хүсэл, эрмэлзэлтэй намын гишүүд, дэмжигчид, аж ахуйн нэгж байгууллагууд тусламж үзүүлжээ.

Үүний дотор 10 гаруй мянган иргэд намынхаа шинэ байранд хандив үзүүлсэн гэдгийг удирдлагууд нь мэдээлсэн. Мөн барилгын үйл ажиллагаа эрхэлдэг намын гишүүд тус байрыг барихад ихээхэн дэмжиж буй гэнэ. Тус намын хувьд 2011 оны гуравдугаар сарын 1-ний өдөр шинэ байрныхаа нээлтийг хийнэ. Ийн тал талын тусламж, дэмжлэгээр МАХН Монгол Улсын түүхэнд 90 жил оршин тогтсоныхоо ойн баяртаа будаг нь ханхалсан Соёмбо хэлбэртэй шинэ байраараа бэлэг барих гэж байна. Харин одоогийн байдлаар барилгын ажлын явц нь 70 гаруй хувьтай яваа аж. Өнгөрсөн долдугаар сард намын генсек У.Хүрэлсүх барилгын ажлын явцтай газар дээр нь танилцав. Барилгын ажлыг "Өндөр буянт холдинг" группээр хийлгэж байгаа юм.

МАХН-ын дэргэдэх залуучуудын байгууллага болох МАСЗХ нь IV их хурлаараа нэрээ шинэчлэн Нийгмийн ардчилал-Монголын залуучуудын холбоо болсон. Мөн даргаа ч сольсон. Энэхүү чуулга уулзалтад цугларсан 500 орчим залуус энэ сарын 17-ны өдөр намынхаа шинэ байранд хандив өргөсөн юм. Тэд 10 сая төгрөг хандивлажээ. Ах нарынхаа шинэ өргөөнд хандив өргөхгүй бол тун болохгүй гэдгээ залуус хэнээр ч заалгахгүй мэддэг бололтой. Учир нь цаашдаа тэдний ч суух өргөө байх юм бил үү хэн мэдлээ. Давхар өөрсдийнхөө байрыг босгоход хувь нэмрээ оруулаад авсан.

АН-ынхны шинэ байрны хандив зогсонги байдалтай байна
МАХН-ыг "Тусгаар тогтнолын ордон" нэртэй шинэ байр барихыг сонссон даруйдаа АН хөдөлгөөнд орж эхэлсэн. Учир нь тэд МАХН-аас дутахыг хүссэнгүй. МАХН 90 жилийнхээ босгон дээр шинэ байртайгаа золгох бол АН-ынхан 20 жилийн ойгоороо 20 давхар байрныхаа шавийг тавилаа. Шав тавих ёслолынхоо үеэр АН-ын дарга Н.Алтанхуяг батлахтай гишүүд, үнэмлэхтэй иргэдэд хандан ширхэг тоосгоны хандив өргөхийг уриалсан. Мөн тэд "Ардчиллын өргөө-Ард  түмний  өргөө" хэмээн шинэ байраа нэрлээд байгаа юм. Гэхдээ барилгын ажил хараахан эхлээгүй. Харин хандив цуглуулах ажил ид өрнөж буй аж. Ардчиллыг дэмжигч, гишүүдийн хандив 80 гаруй сай төгрөг болоод байгаа юм байна. АН-ынхан өнгөрсөн зун хөдөө орон нутгаар яван чуулга уулзалт хийгээд ирсэн билээ.

Тэд ийн явахдаа шинэ байрныхаа хандивын хайрцагийг авч явахаа мартаагүй юм. Хөдөө орон нутгийн ардчиллыг дэмжигчдийн хандив 40 орчим сая төгрөг болсон аж. Мөн топ 100 аж ахуйн нэгжүүдээс нийлээд 100 гаруй сая төгрөг цугларчээ. "Ардчиллын өргөө-Ард түмний өргөө" хэмээх шинэ байрны хандивлах ажиллагаа нь одоогийн байдлаар зогсонги байдалтай байгаа аж. Ямартай ч хандив зогсонги байгаа ч АН-ынхан энэ сардаа багтаан барилгын ажлаа эхлүүлэх гэнэ. Харин ирэх сонгуулиас урьтаж Ардчиллын өргөөгөө босгох төлөвлөгөөтэй байгаа юм байна. МАХН-ын генсек У.Хүрэлсүх өөрийн байрны барилгын ажилтай танилцаж явахдаа "АН-ынхан адилхан байр барьж байгаа. Ийм байж бусад нөхдийнхөө бүтээн байгуулалтад битгий дургүйцээд бай" гэх маягийн үг унагаж байсан. Энэ мэт хоёр намын хоорондох өнгөний сонирхол хэзээ дуусах вэ. Ямартай ч хандиваар сүндэрлэх хоёр намын өргөөг бид удахгүй харах нь. Харин сүндэрлэснийх нь дараа хэнийх нь илүү болов гэдгийг хүн бүр өөр өөрийнхөөрөө шийдэх биз.