Улаанбаатар хотын  Үндэсний цэцэрлэгт хүрээлэнг хөгжүүлэх төслийн багийн ахлагч Петр Рүтенийг хотын дарга Г.Мөнхбаяр өнөөдөр хүлээн авч уулзлаа.  Энэ үеэр цэцэрлэгт хүрээлэнгийн техник эдийн засгийн үндэслэлийг олон улсын түвшинд боловсруулахыг ноён Рүтенээс хүссэн юм.  Үндэсний цэцэрлэгт хүрээлэн бий болох уг газар нь Улаанбаатар хотын цэвэр усны нөөц талбай.

Сүүлийн жилүүдэд Туул голын урсац жилээс жилд татарч байна.  Цэцэрлэгт хүрээлэн байгуулагдснаар Туул голын усны түвшин нэмэгдээд зогсохгүй нийслэлчүүд амралт, чөлөөт цагаа ая тухтай  өнгөрүүлэх газартай болох юм гэж хотын дарга онцоллоо.

Үндэсний  цэцэрлэгт хүрээлэнг хөгжүүлэх төслийн багийн ахлагч  хамгаалалтын бүс байгуулах талаар саналаа илэрхийлээд хүрээлэнгийн эргэн тойронд баригдах гүйлт, дугуйн зам зэрэг танилцуулгыг өглөө. Цэцэрлэгт хүрээлэн гэж ямар зүйл байдгийг жинхэнэ утгаар нь харуулахаар төлөвлөсөн энэ ажилд хот анхаарлаа тавьж байгаа.  Ирэх 12 сард төсөв хэлэлцэх үеэр санхүүжилтийг нь шийдүүлэх учраас ТЭЗҮ дээрээ энэ бүхнээ сайтар тусгахыг санууллаа.

Мөн Үндэсний цэцэрлэгт хүрээлэнгийн эргэн тойронд барилга байгууламж болон томоохон орон сууцны хороолол огт бариулахгүй гэж Нийслэлийн Засаг дарга бөгөөд Улаанбаатар хотын захирагч Г.Мөнхбаяр амлав.