Хуучин Улсын филармони байсан. Дараа нь уран сайхны зураг авдаг газар болж хожим хойно "Монголын ахмадын чөлөөт холбоо"-ны байр гэгдэх болсон Сүхбаатарын талбайн урд талын хоёр давхар барилгыг нийслэлчүүд андахгүй. Энэхуү барилгыг 1931 онд гадна талыг нь тоосго, дотор засал чимэглэлийг нь модоор өнгөлж барьсан гэдэг. Харин уг байшинд ажил, үйлчилгээ явуулж болохгүй гэсэн УМХЕГ болон НМХГ-ын дүгнэлт хэдэн жилийн өмнө гарсан. Уг шийдвэртэй зэрэгцэн зарим ахмадууд "Энэ бол түүхэн барилга. Тиймээс бид нураалгахгүй" хэмээн тэмцсэн. Харин нөгөө хэсэг нь түүхэн барилга гээд балгас болтол нь байлгалтай биш. "Нэгэнт ашиглагдах хугацаа нь дууссан энэ барилга алтаар өнгөлсөн ч нурна" хэмээж байсан. Харин одоо уг барилгыг буулгах ажил дуусах шатандаа оржээ.

Энэ талаар Нийслэлийн барилга хот байгуулалт, төлөвлөлтийн газрын Сүхбаатар дүүрэг хариуцсан архитектор Д.Хан-Уулаас тодрууллаа.

"Монголын ахмадын чөлөөт холбоо"-ны байрыг буулгаж эхэлсэн гэж дууллаа?
Тийм ээ. Энэ барилгыг нураах ажил дуусч байна. Сүхбаатар дүүргийн нэгдүгээр хороонд байрлах "Монголын ахмадын чөлөөт холбоо"-ны байр "Зам Инвест" хувьцаат компанид эрх нь шилжсэн байдаг. Туc компани "Монголын ахмадын чөлөөт холбоо"-ны байрны суурин дээр 18 давхар офиссын зориулалттай барилга барихаар зураг төслөө бидэнд ирүүлcэн.

Нийслэлийн төв цэгт хоорондоо авцалдаагүй өндөр барилгууд баригдлаа гэх иргэдийн шүүмжлэл байдаг?
"Монголын ахмадын чөлөөт холбоо"-ны 540 метр квадрат талбайг тэр чигээр нь барилгажуулахгүй. Шинээр босох уг барилга 300 орчим метр квадрат зай эзэлнэ. Манайд иргэд, аж ахуйн нэгж барилга барих хүсэлт тавьдаг. Үүнийг нь Нийслэлийн мэргэжлийн комиссын хурлаар хэлэлцэж гишүүдийн саналаар ямар барилга барихыг шийддэг. Энэ шийдвэрийн дараа Нийслэлийн Засаг даргын захирамж гардаг. "Зам Инвест" компанийн бидэнд ирүүлсэн эхний зураг төсөл шаардлага хангахгүй байгаа. Боломжтой хувилбараар зургийг нь засуулж хурлаар оруулахаар бэлтгэж байна. Зураг төслөө шаардлагын дагуу хийчихвэл ажил нь батлагдана. Зураг төсөл батлагдсаны дараа ерөнхий ажил эхэлнэ.

Уг барилга хэзээ ашиглалтад орох бол?
-Барилга хэзээ ашиглалтад орох талаар одоогоор хэлж мэдэхгүй байна. Энэ бол бидний хариулт өгөх асуудал биш.

Дээрх барилгын ажилтай уялдан тэр хавийн зам өргөснө гэсэн яриа байгаа?
Сүхбаатарын талбайг нар зөв тойрсон замын уулзварын хөдөлгөөнийг өөрчилье гэсэн иргэдийн санал их ирдэг. Энэ дагуу Сүхбаатарын талбайн баруун, зүүн талын замаар саадгүй зорчих дөрвөн замын уулзвар болгохоор зураг төсөл нь хийгдсэн. Энэ засварын ажил удахгүй хийгдэнэ. Өөрөөр хэлбэл "Монголын ахмадын чөлөөт холбоо"-ны байр уг замын ажил хоорондоо уяддаатай хийгдэх юм. Тус компанийн одооны хийсэн зураг нь энэ замтай уялдуулаагүй байгаа юм. Тиймээс буцаасан. У г уулзварыг хийхэд Шангириллагын урд талын цэцэрлэгт хүрээлэнгийн өнцөг, "Монголын ахмадын чөлөөт холбоо"-ны байрнаас тодорхой хэмжээгээр хасагдаж газарт орно. Замын ажлыг Нийслэлийн авто замын газар тендер зарлаж хийнэ.

Дараа нь бид "Монголын ахмадын чөлоөт холбоо"-ны байрыг буулгах нь зөв эсэх талаар иргэдийн санал бодлыг сонслоо.

Нийслэлтэйгээ зохицсон барилга барих ёстой.

Сүхбаатар дүүргийн нэгдүгээр хорооны иргэн Л.Баяр-Эрдэнэ "Монголын ахмадын чөлөөт холбоо"-ны байр хотын төвд байрладаг. Тиймээс нийслэлтэйгээ зохицсон барилга байх ёстой. Нэг хэсэг буулгана, буулгахгүй гэж их талцсан. Тэд хоорондоо зохицож асуудлаа шийдэх хэрэгтэй байх. Энэ барилга хэдий хотын түүхийн нэг хэсэг боловч аюулгүй байдлаа бодох юм бол нураасан нь дээр гэж бодож байна.

Барилга бол хүний амь настай холбоотой асуудал

Өмнөговь аймгийн Байгаль орчин аялал жуулчлалын газрын дарга О.Бадарч
"Монголын ахмадын холбоо"-ны байр олон настай барилга буулгасан нь зөв гэж боддог. Барилга бол хүний амь настай холбоотой асуудал. Энэ нийгмийг өдий хүртэл бүтээлцсэн ахмадуудынхаа байрыг дайраад буулгалаа гэж бодохгүй байна. Цаана нь заавал буулгах шалтгаан бий гэж ойлгож байгаа.