-Нийслэлд 4838 айлын орон сууц, 62 үйлдвэр үйлчилгээний барилга шинээр ашиглалтанд оржээ- Хуучин Шар хад, Маахуур, Цагаан даваа, Цагаан хуаран, Баянхошуу, Толгойт гээд хэдхэн гэр хороолол байлаа.

Тэр үед хүн амын ихэнх нь байшин хороололд амьдардаг байсан гэлцдэг. Гэтэл одоо Улиастай, Хужирбулан гээд хүн ам суурьшаагүй газар алга. Хүн амын 60-аас дээш хувь нь гэр хороололд амьдарч байгаа болохоор байгаль экологи, эрчим хүчний хангамж гээд бүх чиглэлээр хотын даац хэтэрч байгааг мэргэжилтнүүд сануулсаар байгаа. Үүнийгээ дагаад утаа, бохир орчин үүсч Үндсэн хуулинд заасанчилан хүн амын эрүүл амьдрах нөхцлийг хангах асуудал үндсэндээ алдагдчихсан. Бид өвөлдөө утаа, зун болохоор шороон ордод амьдарч байна.

Зун нь гэр хорооллынхон засмал замгүйгээс болж утаанаас илүү уушигны багтраа өвчин үүсгэдэг тоосонцороор амьсгалсаар байгаа. Үнэндээ гэр хорооллыг барилгажуулсанаар дээрх зовлонгоос нийслэлчүүд ангижирах нь тодорхой. Гэхдээ хэдийд бид соёлт ертөнцөд хэл тавих юм бол оо. Хөдөөнөөс их нүүдэл тасраагүй энэ үед гэр хороолол ул болно гэдэг юу л бол гэх эргэлзээ хэн хүнд байгаа. Ямартаа ч Зам тээвэр, барилга хот байгуулалтын яамнаас нийслэл болон орон нутагт 100 мянган айлын орон сууц барих төслийг боловсруулж Засгийн газраар хэлэлцүүлсэн. Эл хөтөлбөрөөр бол эхний ээлжинд хүн амын 30 хүртэлх хувийг 2015 он гэхэд инженерийн шугам сүлжээтэй орон сууцанд оруулах зорилтыг дэвшүүлж байгаа. Тухайлбал, 100 мянган айлын орон сууц төслийн хүрээнд Улаанбаатар хотын 35 байршилд 80 мянган айлын орон сууцны цогцолборыг барьж байгуулахаар төлөвлөсөн. Улмаар гэр хорооллыг инженерийн дэд бүтэцтэй болгож 32100 сууцыг ашиглалтад оруулах тухай тус яамныхан төсөлдөө тусгасан. Түүнчлэн Яармаг, Буянт-Ухаа, Баянголын ам, Ирээдүйн хороолол, "Ургахнаран", "Ирмүүн хотхон" гээд шинэ суурьшлийн бүсэд 20 мянга орчим айлын орон сууц барих ажлыг хийхээр төлөвлөсөн.

"Иргэдээ орон сууцжуулах талаар олон жил ярьсан, тодорхой хэмжээгээр орон сууц барьсан боловч энэ хэрэгцээ илүү хурдацтайгаар нэмэгдсээр байна. Иймд их хэмжээний орон сууц барих далайцтай хөтөлбөр шаардлагатай болсон тул 100 мянган айлын орон сууц хөтөлбөрийг боловсруулахад хүргэсэн" хэмээн Х.Баттулга сайд онцолж байсныг санаж байна. Үнэхээр 80 мянган айлын орон сууц баригдчихвал наад зах нь бид "утаа" гэгч мөнхийн зовлонгоосоо ангижирна.

Эсгий хотоос хүрээгээ тэлсэн нийслэл маань эдүгээ нэг сая гаруй хүн амтай болтлоо өргөжлөө. Таван удаа хот төлөвлөлт хийсэн нийслэл маань их төвлөрлийг чадан ядан дааж явна. Сүүлийн хэдэн жил өндөр барилгууд их хотод тун эрчимтэй сүндэрлэж байгаа. Бөөрөөрөө нийлсэн барилга, их бүтээн байгуулалт гээд сайн, саараар нь хэлэх хүмүүс олон.

Ямартаа ч улсын хэмжээнд гүйцэтгэсэн барилга угсралт, их барилгын ажлын 59.3 хувь нь нийслэлийн нутаг дэвсгэрт хийгдээд байгаа аж. 2010 оны байдлаар нийслэлд барилга угсралтын тусгай зөвшөөрөлтэй 939 аж ахуйн нэгж бүртгэгдсэн байна. Үүний 30 хувь нь идэвхтэй үйл ажиллагааг явуулан нийтдээ 298.6 тэрбум төгрөгийн барилга угсралтын ажил хийж 4838 айлын орон сууц, 62 үйлдвэр үйлчилгээний барилгыг ашиглалтад оруулжээ. Эңдээс үзэхэд гэр хорооллоос нэлээн хэдэн өрх байшин хороололд шилжсэн биз ээ.
Улаанбаатар хот улсын дотоодын нийт бүтээгдэхүүний 50 орчим хувииг үилдвэрлэж, төсвийн орлогын 47.1 хувийг бүрдүүлж байгаа гэсэн статистик мэдээ бий. Нийслэлд барилга угсралтын 600 гаруй кран байгаагаас 68 нь байшин кран 100 гаруй нь авто кран эзэлдэг байна. Энэ нь нийслэлийн их бүтээн байгуулалт эрчимтэй өрнөж байгааг илтгэж буй хэмээн хотын дарга хэлж байсан. Шинэ бүтээн байгуулалт, дунд хугацааны зорилт хөтөлбөрийн хүрээнд нийслэлд баригдах 80 мянган барилгын ажлын эхлэл тавигджээ. Дээрх барилгыг барихад инженерийн дэд бүтцээр хангахын тулд зургаагийн б, в, тавын в, 12-ын б дулааны бактериал шугамыг өргөтгөх, сунгах ажлуудыг хийж дуусгасан байна. Түүнчлэн Баянголын аман дахь орон сууцны айлын дулаан, цэвэр усны шугам, усан сангийн эхний ээлжийн барилгыг барьж дуусгасан байна. Үүний бохир усны тулнек коллекторын хөрөнгийн асуудлыг Засгийн газраас шийдвэрлэсэн аж. Энэ мэт их бүтээн байгуулалтын суурь ажлууд хийгдэж эхэлжээ.

Орон сууц гэдэг нүүдэлчин удмын эсгий гэртэй монголчууд бидний хувьд хамгийн тохилог, цэвэр, баталгаатай, насны хэрэглээ мэт ойлгогдсоор ирсэн. Энэхүү ойлголтыг барилга босгож буй зарим хүмүүс сайн ухамсарлах ёстой. Тэд зөвхөн зоосны нүхээр бус ирээдүйн баталгаатай барилгыг сүндэрлүүлнэ гэдгээ умартахгүй бол нийслэл ч бас ч үгүй бүтээн байгуулалт өрнөж буйг дээрх баримт илтгэж байна.