...Хамгийн гол нь чанар. Тэр тусмаа тохижилтын ажилд түлхүү анхаарах ёстой. Орхигдуулж ерөөсөө болохгүй. 100 айлын замын тендерт ялж, ажлаа гүйцэтгэсэн дөрвөн компанийн тохижилтын ажлын гэрээг цуцалсан. Дүүргүүдийн ТҮК-иуд үргэлжлүүлэн гүйцэтгэж байгаа. Тиймээс зөвхөн зорчих хэсэгт анхаарах бус явган хүний зам, гэрэлтүүлэг, ус зайлуулах шугам хоолойн ажлаа сайн гүйцэтгээрэй хэмээн Нийслэлийн Засаг даргын орлогч Б.Мөнхбаатар хэллээ. Тэрбээр Гэсэр сүмээс Бизнес хөгжлийн төв хүртэлх 1 км гаруй замын ажил, Баруун 4 замаас Баянбүрдийн тойрог хүртэлх замын ажилтай танилцсан юм.

Гэсэр сүмээс Баянбүрдийн тойрог хүртэлх 600 гаруй метр замын хучилтын ажлыг “Ялгуусан” компани гүйцэтгэж байна. “Ирэх сарын 1 гэхэд ашиглалтад өгөхөөр ажиллаж байна. Хоёр бригад гарсан. Замын баруун зүүн хэсэгт ажиллаж байгаа. Гэсэр сүмээс Баянбүрд орон замын хатуу хучилтыг энэ сарын 17-нд дуусгасан. Тохижилтын ажлыг чанартай гүйцэтгэх талаар анхааралдаа авъя” хэмээн тус компанийн инженер М.Мөнхбаяр ярьсан. Тэднийхэн хичээлийн шинэ жил эхлэхээс урьтан Гэсэр сүмийн уулзвараас Баруун дөрвөн зам хүртэлх 610 гаруй метр замын хучилтыг тохижилтын ажилтай нь хамт гүйцэтгэхээр төлөвлөж ажиллаж байгаа аж.

Харин Гэсэр сүмийн уулзвараас зүүн тийш буюу Бизнес хөгжлийн төв хүртэлх эсрэг урсгалын тойрог замыг “Экспресс зам” компаний гүйцэтгэж байна. Замын хашлагыг суурилуулж эхэлжээ. Ногоон байгууламж руу 0,5 метр, харин замынхаа хоёр хажуу руу 1 метр орчим сунгахаар зураг төсөл нь гарсан байна. Гэтэл гэрэлтүүлгийн шон, түүнийг дагасан холбоо, интернэт, утасны гээд түмэн зүйлийн кабель татсанаар ажилд нь саад учраад байгаа гэнэ. Өөрөөр хэлбэл, агаараар, газар доогуур сүлжилдсэн энэ олон кабель хариуцах эзэнгүй, харах хүнгүй шахам байдаг гэхэд болно. Замын трастад орсон талаар дуулгаж, зам дагасан шонгуудыг буулгаж хураах болсноо хэлж, ярилцах гэхээр эзэн олдож өгөхгүй зовлонтой байгаа талаараа “Экспресс зам” компанийн захирал Э.Чинбат орлогч Б.Мөнхбаатарт танилцуулсан. Харин орлогч “Өнөөдөр замын ажлын явцтай танилцсанаар хэд хэдэн асуудлыг мэдэж авлаа. Энэ олон кабелийн учрыг олох ёстой. Яваандаа хотын нэгдсэн кабелийн тунель барьж, замын ажил, ямар нэгэн засвар үйлчилгээнд саад болохооргүй тохижуулах нь зөв. Ийм алхмыг ч хийх хэрэгтэй юм байна” гэлээ.

Дээр доргүй сүлжилдсэн кабелийн сүлжээнүүдийн учрыг хурдан олж чадвал энэ хавийн зам даруй 3 метр орчмоор өргөсөх аж. Өмнө нь Гэрэлтүүлэг компани иймэрхүү шугам сүлжээг хариуцаж, гэрээ хийж, эрх олгодог байсан бол хувьчлагдсанаас хойш ийнхүү эзэнгүйдсэн байна.  Тиймээс Б.Мөнхбаатар дарга Авто зам, Мэргэжлийн хяналт, Өмчийн газар, Гэрэлтүүлэг компани, гүйцэтгэгч компаниудын удирдлагуудыг урьж өнөөдөр уулзаж байна.