Бид “Архитектур” булангийнхаа өмнөх дугаараар үхэр жилийн топ барилгуудыг танилцуулж байсан бол энэ удаа уг барилгуудын нэг ШУТИС-ын номын сангийн барилгын дэлгэрэнгүйг уншигч та бүхэндээ хүргэж байна.

 

Монгол улсад номын сангийн зориулалтаар тусгайлан барьсан барилга гарын таван хуруунд багтахаар цөөн бий. Тэр дундаа улс орондоо тэргүүлэх сургуулиудын хувьд номын сангийн стандарт хангалтгүй, олон хэсэгт хуваагдсан номын хүрэлцээ муу байдаг. Үүнээс болж суралцагч оюутнуудын номын сан ашиглах, мэдлэг, мэдээллийг нэг дор олж авах боломжийг бүрэн гүйцэлдүүлж чадахгүйд хүрдэг байв.

 

Орчин үед номын сан гэдэг ойлголт нь зөвхөн хэвлэмэл ном унших бус цахим хэлбэрээр ном болон бусад мэдээллийг хайх, унших, хэвлэх, худалдан авах, бие даан суралцах, олон талын мэдлэгийг авах зэрэг шаардлагыг бүрэн хангасан байх ёстой болсон. Үүнийг анзаарсан ШУТИС-ын ректорат номын сангийн шинэ барилга барих шийдвэр гарган барилгын зураг төслийг “Зураг төсөл судалгааны төвд” захиалан гаргуулжээ. Тус төв нь уг барилгын архитектурын зураг төслийг бүрэн гүйцэтгэсэн бөгөөд, бусад инженерийн шийдлүүдийг гэрээлэгч байгууллагуудтай хамтран хийж гүйцэтгэсэн байна. Зураг төсөл судалгааны төв нь ШУТИС-ын шинжлэх ухаан, онол практикыг хослуулан үйл ажиллагаа явуулдаг төвүүдийн нэг юм. Уг байгууллага нь зураг төсөл боловсруулахаас гадна архитектур, хот төлөвлөлтийн талбарт судалгаа шинжилгээ хийх, сургалт семинар явуулах, хэвлэн нийтлэх зэрэг олон талт ажиллагаа явуулдаг мэргэжлийн байгууллага аж.