Газрын харилцаа, барилга, геодези, зураг зүйн газрын  урилгаар Япон улсын “Бохир усны ассоциаци”-ийн гадаад харилцааны газрын захирал ноён Сакамаки, тус газрын дэд захирал ноён Коваяаши, “Nippon Koei” ХХК-ийн ахлах инженер ноён Иноу нар 2010 оны 08 дугаар сарын 16-21-ний хооронд айлчлан тус газрын ОСНАА-н хэлтэстэй хамтран ажиллав. Айлчлалын үеэр Японы мэргэжилтнүүд Улаанбаатар хотын Төв цэвэрлэх байгууламж, Нисэхийн цэвэрлэх байгууламж, Багануур дүүргийн цэвэрлэх байгууламж, Өндөрхаан хотын цэвэрлэх байгууламжийн үйл ажиллагаатай газар дээр нь танилцаж мэргэжлийн чиглэлээр хамтран ажиллалаа.

 Цаашид Монгол Улсын хот суурин газрын бохир усны цэвэрлэх байгууламжийн одоогийн нөхцөл байдлыг сайжруулах чиглэлээр  орон нутгийн мэргэжлийн байгууллагатай хамтын ажиллагаатай болох боломжийг судлах, хоёр улсын хооронд харилцан мэдээлэл чөлөөтэй солилцох, ижил төрлийн сургалт аяллыг зохион байгуулах, Япон улсын талаас “Жайка”-ийн шугамаар хэрэгжүүлэх төсөлд зөвлөх үйлчилгээ үзүүлэх, цэвэрлэх байгууламжид  шинэ техник, технологи нэвтрүүлэхэд дэмжлэг үзүүлэх, хөрөнгө оруулалт хийх нөхцөлийг судлах зорилгоор хамтран ажиллахаар санал солилцов.

Мөн  2010 оны 08 дугаар сарын 20-ны өдөр ЗТБХБ-ын яам, УСУГ, Төв цэвэрлэх байгууламж, Байгаль орчны яам, Усны газар, ШУТИС, мөн хувийн хэвшлийн мэргэжлийн байгууллагуудтай хамтарсан уулзалт зохион байгуулав. Уулзалтаар Япон улсын “Бохир усны ассоциаци’’ болон холбогдох байгууллагуудтай хамтран Монгол орны хот тосгон, сум суурин газрын цэвэрлэх байгууламжийн судалгааг ойрын таван жилд багтаан хийж, цаашид шинэ техник, технологи нэвтрүүлэхэд дэмжлэг үзүүлэх, хөрөнгө оруулалт хийх нөхцөлийг бүрдүүлэхэд хамтран ажиллахаар боллоо.