Монголын авто замчдын холбооны удирдах зөвлөлийн ээлжит хурлаар зам, гүүрийн нэгж уртын жишиг үнэ гаргаж зарлаж байх нь зүйтэй гэсэн санал гарсантай холбогдуулан тус холбооны Норм, стандарт, хууль эдийн засгийн ажлын хэсэгт үүрэг болгосон билээ.  

Энэ дагуу ЗТАЖЯ-наас 2007 онд батлан гаргасан одоо мөрдөж байгаа RBC-Estimator программыг ашиглан Монгол улсын зам цаг уурын төрөл бүрийн бүсэд байгаа, Улаанбаатар хотоос харилцан адилгүй алслагдсан төрөл бүрийн урттай 3 зам, 2 гүүрийн бодит төсөвт өртгийг бодон гаргаж, уртад нь хувааж нэгж уртын дундаж үнийг тооцон гаргалаа. 2010 оны 2-р улирлын III зэргийн, асфальтобетон хучилттай 1 км замын үнэ 475,0 сая төгрөг, Г-6,5м-ийн хэмжээтэй 1у/м төмөр бетон гүүрийн үнэ 14,0 сая төгрөг байна.

Монголын авто замчдын холбооны норм, стандарт хууль эдийн засгийн Н.Адилбиш ахлагчтай ажлын хэсгийн гаргасан энэхүү тооцоог танилцуулах уулзалтыг 2010 оны 8 дугаар сарын 27-ны өдөр Авто замын газарт зохион байгууллаа. Тус уулзалтанд "Өдрийн сонин", "Хөдөлмөр сонин", "Үндэсний шуудан", "Ардын эрх", "Нийслэл таймс" зэрэг олон нийтийн хэвлэл мэдээллийн хэрэгслийн сэтгүүлчид, "Мөнгөн мод" ХХК, "Ялгуусан" ХХК, Төв-Азза" ХК, "ICT-Sain Consulting" "Нарны үүсгэл" ХХК, "Мон-Рос-Алтай"ХХК, "Техно-Арж"ХХК, "Заабар" ХХК, "Арж капитал" ХХК зэрэг дотоодын замын компаниудын төлөөлөгчид, Засгийн газрын хэрэгжүүлэгч агентлаг-Авто замын газар, Нийслэлийн авто замын газар, Авто замчин үйлдвэрчний эвлэлийн холбооны төлөөлөгчид оролцлоо. Монголын авто замчдын холбооноос жишиг үнийг тооцож гаргасныг замын салбарын хувийн хэвшлийнхэн халуун дотноор хүлээн авч дэмжин, талархлаа илэрхийлж байлаа. Хуралд оролцогчдоос МАЗХ нь уг тооцоог холбогдох газруудад аль болох түргэн танилцуулах нь зүйтэй гэсэн санал дэвшүүлсэн бөгөөд тууштай байхыг хүслээ.  

Авто замчдын ахуй амьдралыг дээшлүүлэх, компаниудыг оршин тогтнох баталгааг хангах, ажлын чанарыг эрс сайжруулан объектуудыг гэрээт хугацаанд нь ашиглалтад оруулах зорилгоор улирал тутам 1 км замын, 1у/м гүүрийн жишиг үнийг зарлаж бүх түвшинд баримталж ажиллах нь зүйтэй гэж үзэж байна.