Сонгинохайрханчууд хүрхрээтэй болжээ

Barilga
2019-11-05

Сонгинохайрханчууд хүрхрээтэй болжээ

Нийслэлийн Иргэдийн Төлөөлөгчдийн хурлын дарга Т.Билэгт Сонгино Хайрхан дүүргийн тохижилт болон хөрөнгө оруулалт, бүтээн байгуулалтын ажилтай танилцлаа.

Тус дүүрэг нь намрын тохижилтын ажлын хүрээнд Саппорогийн тойргоос эхлээд 2,7 км замын хайс болон зүлэгжүүлэлтийг тогтвортой амжиргаа төслийн хүрээнд хийж хэрэгжүүлсэн байна.

Мөн Сонгино Хайрхан дүүрэгт байрлах “Катеринг деливери” ХХК нь орон сууц барилга бариад өөрсдийн хөрөнгөөр гаднах талбайдаа нэг метр сул шороо үлдээлгүй 600 сая төгрөгийг тохижилтод зарцуулан усан оргилуур хийж, зам талбайгаа эко хавтангаар хучсан байлаа.

Нийслэлд хэрэгжиж буй “Явган хүний зам” арга хэмжээний хүрээнд тус дүүрэг 14 газрыг нүүлгэн шилжүүлэх юм байна. Энэ ажлын хүрээнд 62-р сургуулийн өмнө байрлах 6 контейнерыг зөөж, хүүхэд настангуудын нарлан суух саравч, сандал болон эцэг эхчүүдэд хүүхдээ сургуульд хүргэж өгөх, авахад тус дөхөм болохоор машины зогсоол хийсэн байна.

Энэ жил Сонгино Хайрхан дүүргийн хувьд 7,19-р хорооны цогцолбор баригдаж байгаа бөгөөд ажлыг явц 95 хувьтай байгааг дурьдаад цаашид 4,18-р хороонд хорооны цогцолбор баригдах талаар дүүргийн Засаг дарга Д.Болд танилцуулж байлаа. Үүнээс гадна дүүргийн зүгээс иргэдэд хандсан үйлчилгээг үзүүлэхэд газрын асуудал маш хүнд өрхийн эмнэлэг, цагдаа, сургууль цэцэрлэг барихад газар олдохгүй байгаа тул дараа жилийн төсөвт иргэдээс газар худалдан авах мөнгийг суулгаж өгөхийг хүсэж байлаа.

Нийслэлийн Иргэдийн Төлөөлөгчдийн хурлын дарга хэлэхдээ: Газрын зөрчлийг арилгах хэрэгтэй сануулаад, ингэснээр хорооны цогцолбороо барихын тулд иргэдээс газар худалдан авах шаардлагагүй болохыг хэлсэн юм.

Нийслэлийн ойн баяр буюу талархалын баярыг урьдаж тус дүүрэг нь тамгын газрынхаа урд хүрхрээтэй болсон байлаа. Энэ хүрхрээ бүхий усан оргилуурыг дүүргийн Засаг дарга Д.Болд санааг гарган бүтээлгэсэн бөгөөд бусад усан оргилуурыг бодвол илүү хямд үнээр бүтэж байгаагийн дээр иргэд оршин суугчдын талархалыг хүлээж буй тохижилтын ажлын нэг болж чадсан байлаа.

Сонгино Хайрхан дүүргийн хувьд бусад дүүргээс ялгарах онцлог нь хүн ам болоод гэр хороолол хамгийн ихтэй дүүрэг билээ. Энэ ч утгаараа гэр хороолол дундах 125-р цэцэрлэгийн үйл ажиллагаатай Иргэдийн Хурлын дарга танилцсан юм. 125-р цэцэрлэгийн хувьд 2009 оны өвөл ашиглалтад орж үйл ажиллагаагаа эхлүүлсэн бөгөөд 60 хүүхэд хүлээн авах боломжтой боловч одоогоор 138 хүүхдийг хүлээн авсан байлаа. Үүнээс харахад гэр хороолол дунд хүүхдийн цэцэрлэг сургууль маш хэрэгцээтэй байгааг илтгэж байна.