Италийн архитектор, уран барималч Ливио Де Марчи уран бүтээлдээ амьдралыг сонирхолтойгоор дүрслэн үзүүлдэг өвөрмөц хүмүүсийн нэг ажээ. Тэрээр өөрийн бүтээлдээ ашиглах үндсэн материалаар интоор, хуш, нарсны модыг сонгосон байна.

Бидэнд дасал болсон ердийн сандал ширээнээс ялгаатай нь тэрбээр модоор хувцас, гутал, алчуур, цүнх, ном, шүхэр, мотоцикл гэх мэт “өдөр тутмын” мөртлөө өдөр тутам хэрэглэж үл болох зүйлсийг бүтээдэг нэгэн аж. Юуны өмнө, түүний модон урлалын хийц загвар нь ямар ч интерьертэй гойд зохицож чаддаг нь байгалийн бүтээлийг хувиргаж, “гайхамшиг” болгосонтой холбоотой.

Энэхүү Итали архитектор төрөлхийн уран сэтгэмжтэй, уран зөгнөлч хүн гэнэ. Даавуу, савхи, төмөр, шил, шаазанг “модоор хийсэн гэж үү” хэмээн дуу алдам гайхалтай дууриалган сийлбэрлэн бүтээнэ. Түүгээр ч үл барам Беллуно хэмээх уулархаг мужид үлгэрийн гэмээр байшинг барьсан бөгөөд түүнийгээ хүмүүст, жуулчдад үзүүлж сонирхуулдаг  байна.