Туркийн Засгийн газрын буцалтгүй тусламжаар Улаанбаатар хот дахь Анкарагийн гудамжийг иж бүрэн тохижуулах ажилд 700 мянган ам.доллар зарцуулахаар боллоо. Энэ тухай гэрээнд Нийслэлийн Засаг дарга бөгөөд Улаанбаатар хотын Захирагч Г.Мөнхбаяр, БНТУ-ын Засгийн газрын дэргэдэх Туркийн олон улсын хамтын ажиллагаа, хөгжлийн байгууллага/ТОУХАХБ/-ын Хөтөлбөр зохицуулагч Рахман Нурдун нар өнөөдөр гарын үсэг зурлаа. Туркийн талаас хоёр жилийн хугацаанд Анкарагийн гудамжийг тохижуулах ажлын иж бүрэн судалгааг хийсний үндсэн дээр ирэх онд тус гудмыг тохижуулахаар болжээ.

Бидний нэрлэж заншсанаар Хүнсний нэгдүгээр дэлгүүрийн уулзвараас СУИС-ийн өмнөх уулзвар хүртэлх энэхүү гудмыг орчин үеийн шаардлага хангасан гэрэлтүүлгээр чимэглэж, европ стандартаар тохижилтын ажлыг гүйцэтгэх агаад ирэх сарын эхээр Туркийн талаас мэргэжилтнүүд ирж, хаана ямар тохижуулалт хийхээ тогтох юм байна.

Хотын дарга, Улаанбаатарчуудад сайхан орчин бий болгох нэгэн томоохон ажил эхлүүлэхээр шийдвэрлэж, нийслэлчүүдийн баярын өдрөөр бэлэг барьж буйд иргэдийнхээ өмнөөс талархаж байгаагаа илэрхийлээд, тохижилтын ажилд хотын зүгээс шаардлагатай бүхнийг хийж, өөрийн биеэр хариуцан ажиллахыг Чингэлтэй дүүргийн Засаг даргад даалгалаа.