Монголчууд амины орон сууц асар их барих болсон. Мэдээж сайхан сайхан дизайн, загвартай байшингууд олон бий. Гэвч танд бэлэн байшин худалдаж авах, эсвэл өөрөө барих гэсэн сонголт бий. Тэгэхээр юуны өмнө энэ сонголтоо зөв хийх хэрэгтэй. Хоёрын хооронд юм барьсанд орвол бэлэн байшин худалдаж авахаар мөнгөө цуглуулсан нь дээр.

Аа харин, нэгэнт таны санаанд таалагдах байшин олдохгүй байгаа бол барихаас өөр аргагүй шүү дээ. Тэгвэл одоо та анхаарлаа хандуулна уу.
Юуны өмнө байшин босгоно гэдэг бол жирийн нэг ажил биш юм. Та хичнээн няхуур зөв хандаж, тооцоолж чадна төдий чинээ амар хялбар, найдвартай, зовлон багатай байх болно. Магадгүй сайн байшин барьж чадвал насны хөрөнгө ч болж болох юм. Хэн ч тоохгүй муухан байшин барьчихвал хамаг хөрөнгөө үрэн таран хийсэнтэй ялгаа юу байх билээ. Иймээс сайн байшин баръя гэж бодож байгаа хүнд илүүдэхгүй 10 зөвлөгөөг толилуулъя.

1. Байшингийнхаа Дизайныг Зөвхөн Та л Шийдэх Үүрэгтэй.
Таны юу хүсээд байгааг зөвхөн та л хамгийн сайн мэднэ. Иймээс та энэ тал дээр маш сайн ажиллах үүрэгтэй. Юуны өмнө ямар төрлийн байшин босгохоо шийдэх хэрэгтэй юм. Өнөөдөр амьдрал дээр асар олон төрлийн байшин баригдаж байгааг та бэлхнээ мэднэ. Бүр болохгүй бол шууд хуулах эсвэл дизайныг худалдаж авч болох юм. Гэхдээ зохиогчийн эрхийн асуудлыг сайн анхаарахгүй бол сүүлд нь бөөн төлбөрт унаж магадгүй шүү.
Ер нь сайн байшин баръя гэж бодож байгаа хүн бусдын бэлэн байшингуудыг судлах нь лавтай. Мэдээж танд таалагдах байшингууд гарч л таараа. Гол нь тэр байшингийн яг юу нь таны нүдийг татаад байна вэ? Ямар онцлог, шинж чанар, өнгө будаг нь таныг соронзон шиг татаж байгааг илрүүл. Өөрт таалагдаж байгаа бүхий л шинжүүдийг жагсааж бичээрэй. Болж өгвөл гараараа ноорог дизайн гаргахыг оролд. Жижиг гэлтгүй бүхий л санааг цаасан дээр буулгаж баримтжуулбал нэн сайн. Одоохондоо тэднийг хэрхэн нийлүүлж угсрах талаар бодох хэрэггүй. Энэ бүхэн нь танд цааш цаашдаа буруу сонголт хийж эцсийн дүндээ харамсах байдлаас аврах болно.

2. Барих Байшингийнхаа Дизайны Жагсаалтыг Гарга.
Байшин барихад ерөнхий шаардлагууд гэж бий. Эдгээрийг хамгийн эхэнд гаргах нь маш чухал юм. Үүнд: унтлагын өрөөний тоо, угаалгын өрөөний тоо, гэр бүлийн хэсэг, амрах өрөөний тоо, спортын өрөөтэй эсэх, хүүхдийн өрөөтэй эсэх, хоол хийх өрөө нь тусдаа байх уу, нэгтгэгдсэн байх уу, хоол идэх өрөө байх уу, орох хаалгандаа довжоо, тавцан, асрын алийг нь сонгох вэ, автомашины гарааш байх уу гэх мэт олон асуудлыг тодруулна.
Ийнхүү ерөнхий жагсаалт бэлэн болсон бол өрөөнүүдийн зохион байгуулалтыг шийдэх хэрэгтэй. Мэдээж эхлээд чухал ач холбогдолтойгоос нь эхлэх бол сүүлд нь нэмэлтүүдийг шийдэж болно.
Дараа нь нарийвчилсан дизайнуудыг гаргаж болно. Гал тогооны өрөөний дотоод тохижилт, гол угаалгын өрөөний тоноглолууд, цахилгааны монтажууд, кабель, телефон утасны гүйлтийн зам зэргийг гаргаж болно.

3. Орон Нутгийн Газар Олголтын Хуулийг Судал.
Байшин дангаараа гоё харагддаг үе аль эрт өнгөрсөн. Нэмэлт цэцэрлэг, гоёмсог хашаа, сагсны талбай, машины зогсоол зэрэг нь бүгд нийлж амьдралын тав тухыг хангадаг. Иймээс орон нутгийн газар олголтод хичнээн хэмжээний талбай оногдохыг судалж мэд. Улаанбаатар орчимд 0.7 га газрыг үнэгүй хувьчилж байгаа билээ.

4. Өөрийн Төсөвтөө Баригдах нь Лавтай.
Та өөрийн ерөнхий шаардлагууд, жагсаалтаа гаргасан шүү дээ. Харин одоо бол түүнийгээ төсөвтөө нийцүүлэн тооцоолох шаардлагатай. Энэ бол хамгийн хэцүү боловч заавал мөрдөхийн сацуу хамгийн их ач холбогдол өгөх ёстой хэсэг юм шүү. Үүнийг мэдээгүйгээс болж төсвөө хэтрүүлэн шууд барьсны харгайгаар дутуу баригдсан байшингуудыг Улаанбаатар, зуслан орчмоос төвөггүй олж болно.
Ихэнх хүмүүс төсвөө хэтрүүлэх хандлагатай байдаг. Та ч гэсэн ийм алдаа гаргах гэж байгаад эргэлзэхгүй байна. Гэвч байшинг ганц л удаа барих юм чинь сайн юм баримаар байдаг. Хэцүү л асуудал даа. Сохор зоос ч үгүй болсон хүмүүс тавилга нь дутуу байшиндаа гайхшлаа баран суухыг харахад хэлэх үг олддоггүй юм.
Ер нь санхүүгээ зөв тооцоолъё гэвэл програм хангамж, компьютерийг сайн ашиглах хэрэгтэй. Кибер байшинг босгосны дараа түүний төсвийг гаргахад их хялбархан бөгөөд тодорхой байдаг.

5. Өөрийн Талбайдаа Нийцүүлэх нь Зүйн Хэрэг юм.
Хэт том талбайд жижигхэн байшин барих, эсрэгээр жижигхэн талбайдаа томдсон байшин барих нь аль аль нь цаашдаа төвөг учруулах болно. Ер нь хүн бүрийн газар харилцан адилгүй шинж чанартай. Тийм болохоор өөрийн газраа сайн таньж мэдэх нь их чухал. Үүнийг өөрийн байшингаа босгохдоо анхаарвал зохино. Хэрвээ та газраа сонгочихсон бол байшингийн дизайныг гаргахад их хялбархан юм. Улаанбаатарын зусланд хэт хэвгий газрууд (уулын бэл) их тохиолддог шүү дээ. Жишээ нь ийм тохиолдолд та хэт өвөрмөц дизайн сонгох боломжгүй болно.
Байрлалын асуудал чухлаар тавигдана. Мэдээж гол хаалга, ихэнх цонхнууд тань наран талдаа эсвэл хашааныхаа гол хаалга (гудамж) руу хандах нь ойлгомжтой. Мэдээж байшингийн тань өмнө хэсэгт хашааны тань ихэнх сул талбай нь байвал зохимжтой. Түүнээс гадна угаалгын болон унтлагын өрөөнүүд тань хашааныхаа арын хэсэг рүү харсан байрлалтай байх нь зуйтэй. Учир нь таны цэвэр бохир усны танк байшингийн тань ард байрлах байлгүй.

 Эх сурвалж: www.myhouse.miniih.com