Ямар ч байрны засварыг обой солихгүйгээр хийнэ гэж бараг үгүй, байр сууцны дотоод засалд түүний ач холбогдол маш их билээ. Обой ихэнхдээ бүх төрлийн засал чимэглэлийн суурь болж чаддаг. Обойн өнгөнөөс хамааруулан тавилгаа сонгох нь ч бий бөгөөд тухайн өрөөний болоод гэрийн эзний талаархи таатай, таагүй сэтгэгдэл төрөх гэх мэтийн олон зүйл түүний гадаад өнгө үзэмж ямар байхаас шалтгаалдаг.
Обойн төрлүүдээс хамгийн өргөн хэрэглэгддэг нь цаасан обой. Дутагдалтай тал их бий ч хүмүүс түүнд хана туургаа “даатгасан” хэвээр л байна. Гэвч цаасан обойг цавуудахад л бэрхшээл үүсч эхлэнэ. Харин дараа нь хээг нь яаж тааруулах билээ! гэсэн асуудал тулгарна. Тааруулахад амаргүй бол бүр ч төвөг учрах нь ойлгомжтой. Хээ нь таараагүй бол ирсэн зочид гийчдийн анхаарлыг татна. Үүний зэрэгцээ энд тэнд нь халцарна, шарлана, гандана. Энэ бүх таагүй байдлаас салах гэсээр "обойчин" болж ч магадгүй. Аз болоход, өнөөдөр хана “өнгөлөх” ганц арга нь цаасан обой биш болсон байна. Илүү чансаатай олон төрлийн материал бий болсны нэг нь “шингэн обой” юм. Нэр нь юу гээд байгааг хэлээд өгч байгаа биз.

Тэгвэл шингэн обойг юугаар хийдэг юм болоо?
Энэ нь байгалийн гаралтай хөвөн буюу нийлэг мяндас, сайн чанарын будагч, цавууны хуурай холимог ажээ. Бэлтгэх арга нь ч энгийн: холимгийг саванд хийгээд дээрээс нь зохих харьцаагаар ус нэмнэ. “Наах” нь ч бараг ердийн аргаар хийгдэнэ. Гэвч эцсийн үр дүн нь гайхалтай.
Бидний суудаг орон байр, байшин, албан өрөө хурц булантай засагдсан байдаг. Энд цаасан обойн хээг тааруулан зөрүүлж наахад амаргүй байх бөгөөд хана тэгш биш буюу элэгдсэн бол бүр хүндрэлтэй. Эдгээр бэрхшээл “шингэн обой”-г бий болгоход хүргэсэн бөгөөд хэрэглэхэд ямар нэгэн төвөггүй аж. Түүнээс гадна, ийм обой ханын гадаргууг тэгшилж, жижиг ан цав, нүх сүвийг бөглөж өгнө.
Хэрэв цаасан обойн дээр толбо болчихвол яах вэ? Хариулт нь илэрхий: өдөр бүр харж халаглах, эсвэл хуулж солих. Энд “шингэн обой” байсан бол арай өөр. Бохирдсон хэсгийг нь цэвэрлээд, тэр хэсэгт нь шинээр обой түрхэж өгөхөд хангалттай. Энгийн бөгөөд ямар нэгэн илүү дутуу зардал шаардагдахгүй. Харин удсан хойно нь буюу байнга тамхи татдаг өрөөнд нөхөөс хийсэн бол бусад хэсгээсээ цайвар харагддаг гэдгийг анхаарах хэрэгтэй байдаг ажээ.
“Шингэн обой” нь антистатик бүрхүүлтэй учраас тоос татахгүй. Иймээс цэвэр орчинг бүрдүүлэх бөгөөд дулаан дамжуулалт, дуу чимээ тусгаарлалт сайтай байдаг байна. “Язгууртны” маягийн, тансаг өрөөтэй болъё гэвэл “шингэн обой”-г торгоны хэсэгтэй хольж түрхвэл ханыг даавуугаар хучсан мэт сэтгэгдэл төрүүлдэг аж. Харин түүнийг угааж болдоггүй бол яах вэ? Асуудал биш бололтой. Дээр нь акрилийн лак түрхэхэд болох бөгөөд обойг чийгэнд тэсвэртэй болгодог байна. Ийм төрлийн обойг Барууны орнуудад, манай хойд хөрш ОХУ-д ихээхэн хэрэглэж байгаа юм байна.