Монгол Улсад нийтийн аж ахуйн салбар үүсч хөгжсөний 79 жилийн ойг тохиолдуулан энэ салбарт ажиллаж байсан үе үеийн ахмадууд, ажил эрхэлж байгаа байгууллага, хувь хүмүүст Улаанбаатар хотын Нийтийн аж ахуйг сайжруулах хоёр дахь Төслийг Удирдах Нэгжийн нэрийн өмнөөс болон хувиасаа чин сэтгэлийн баяр хүргэж байна.

Дэлхийн банкны хөнгөлөлттэй зээл, олон улсын санхүүжүүлэгч бусад байгууллагуудын буцалтгүй тусламжийн хөрөнгөөр Улаанбаатар хотод “Нийтийн аж ахуйг сайжруулах төсөл” -ийг хоёр үе шатаар арван гурав дахь жилдээ хэрэгжүүлж хотын захын хороололд ус хангамж, эрүүл ахуй, экологийн байдлыг сайжруулах замаар тэнд амьдарч байгаа иргэдийн ажиллаж амьдрах ая тухтай орчин бүрдүүлж ажлын байр шинээр бий болгох, улмаар ядуурлыг бууруулахад тодорхой хувь нэмэр оруулж байна.

Энэ төслийг хэрэгжүүлснээр нийтийн аж ахуйн салбарт орчин үеийн, дэвшилтэт техник технологи нэвтэрч, барилга угсралтын шинэ технологи арга барилд үндэсний боловсон хүчин суралцаж, олон улсын түвшинд ажиллаж чадахуйц шинэ боловсон хүчнээр эгнээгээ өргөтгөж байгаа нь туйлын бахархууштай зүйл юм. 

Энэ төслөөр байгуулсан барилга байгууламжийг өндөр түвшинд ашиглан нийслэлийн захын хорооллын иргэдэд үйлчилж төсөлд тусгасан арга хэмжээг амжилттай хэрэгжүүлж байгаа Улаанбаатар хотын Ус сувгийн удирдах газрын хамт олонд болон төслийг бүрэн дүүрэн амжилттай хэрэгжүүлэхэд гар бие оролцож байгаа барилгын гүйцэтгэгчид, ханган нийлүүлэгчид, зураг төслийн байгууллагууд, зөвлөхийн багийнханд ажлын амжилт, хамгийн сайн сайхан бүхнийг  хүсэн ерөөе.


“Улаанбаатар хотын нийтийн аж ахуйг сайжруулах
II төсөл” удирдах нэгжийн захирал

Л. Бадамхорлоо    

Төслийн тухай
Улаанбаатар хотын Нийтийн аж ахуйг сайжруулах төсөл нь 1997-2010 оны хооронд хоёр  үе шаттайгаар хэрэгжихдээ гэр хорооллын иргэдийг чанар, стандартад нийцсэн ундны усаар хангах тэргүүн зорилго тавьж ирлээ.

Төслийн үр шимийг 140 000 гаруй иргэд хүртэв.
Төсөл хэрэгжсэн хугацаа: 1997-2003 он
Төслөөр хийгдсэн гол ажлууд:

•    3 усан сан, 3 насос станц,3 халаалтын байр, 85.6 урт шугам хоолойгоор 137 ус түгээх байрыг холбосон шугам сүлжээг Нисэх, Яармаг, Шар хад, Хайлааст, Толгойт, Дэнжийн 1000, Телевиз, Ганданд барив.
•    Хотын төвлөрсөн шугам сүлжээний тоног төхөөрөмжийг шинэчлэж, хотын 2 усан санд иж бүрэн засвар хийж, телеметрийн систем суурилуулсан.

Төслийн хоёрдугаар үе шат:
Төсөл хэрэгжсэн гэр хорооллууд:
Баянхошуу, Дарь-эх, Дамбадаржаа, Чингэлтэй, Наран, Улиастай

Төслийн үр шимийг 350 000 гаруй хүн хүртэв.
Төсөл хэрэгжих хугацаа: 2004-2011
Төслөөр хийгдсэн гол ажлууд:
•    73.4 км цэвэр усны шугам хоолой, 3 усан сан, 4 насос станц, шугаманд холбогдсон 112 ус түгээх байр бүхий ус хангамжийн системийг Баянхошуу, Чингэлтэй, Дарь-Эх, Дамбадаржаагийн гэр хороололд барьж байгуулав.
 
•    Дамбадаржаад 80 айл өрх, 8 байгууллагыг цэвэр бохир усны системд холбох мөн бага оврын цэвэрлэх байгууламж барих загвар төсөл хэрэгжиж байна.
•    Ариутгах татуургын хоолойн CCTV камер бүхий оношлогооны машин, цэвэр бохир усны шинжилгээний орчин үеийн иж бүрэн лаборатори, ус хангамжийн системийн даралт урсац тохируулах хаалтууд, цахилгаан соронзон тоолуур, давтамж хувиргагч, гэр хорооллын болон хотын ус хангамжийн системийг бүхэлд нь хянах алсын удирдлагын систем гэх мэт олон шинэ техник, технологийг төслийн хүрээнд нэвтрүүлж байна.