Газрын харилцаа, барилга геодези, зураг зүйн газрын даргын үүрэг гүйцэтгэгч, дэд дарга Б.Баярсайхан, тус агентлагийн Барилга, нийтийн аж ахуйн албаны дарга Д.Гантулга нар ХБНГУ-д зохиогдсон “БАЙГАЛЬ ОРЧИНД ЭЭЛТЭЙ БАРИЛГА” сэдэвт мэргэжлийн сургалтад оролцлоо. Сургалт “Барилгын салбар дахь уур амьсгал-байгалийн нөөцийн хамгаалал” хөтөлбөрийн хүрээнд зохиогдсон бөгөөд 2010.09.13-наас 2010.09.24-ний өдрүүдэд болж өндөрлөсөн юм. Сургалтад Монголын талаас ЗТБХБЯ, БСШУЯ, ГХБГЗЗГ, ХНХҮГ, МХЕГ-ын Дэд бүтцийн хяналтын алба, Улаанбаатар хотын захирагчийн ажлын алба, ОССК, Монголын Барилгачдын холбоо, хувийн хэвшил зэрэг байгууллагаас нийт 17 хүн оролцсон байна.

Сургалтын эхний өдөр гол зохион байгуулагч InWent байгууллагын уг хөтөлбөрийг хариуцсан ноён Гробэлни холбогдох хүмүүсийн хамтаар Монголын талын хүмүүсийг хүлээн авч уулзаж, уг сургалтын гол зорилго, агуулга, сургалтын хөтөлбөрийн талаар мэдээлэл өгчээ. Мөн “Барилгын салбар дахь уур амьсгал-байгалийн нөөцийн хамгаалал” хөтөлбөрийн талаархи дэлгэрэнгүй мэдээлэл өгч цаашид хамтран ажиллах талаар санал солилцсон байна. Сургалтын дараагийн өдөр ХБНГУ-ын IWO байгууллагын инженер Берхард Шварц Зүүн европын орнууддахь барилгын эрчим хүчний хэмнэлтэд технологиор сэргээн засварлах стратеги болон Зүүн герман дахь угсармал орон сууцны дулаан алдагдлыг бууруулах, инженерийн хангамжийг дэвшилтэд технологи бүхий тоног төхөөрөмж, хэмжих хэрэгслээр тоноглосон тухай туршлагаа танилцуулжээ.

Мөн сургалтын хүрээнд Германд угсармал орон сууцны хорооллуудын барилгыг хэрхэн дулаалсаныг газар дээр нь очиж үзсэн байна. Герман улс нь угсармал орон сууцнуудын 90%-ийг дулаалсан гэж тоо баримт байдаг. Эрчим хүчний хэмнэлттэй байдлаар дулаалах барилгын агаар сэлгэлт, салхивчийн асуудлыг иж бүрэн шийдэх хэрэгтэйг сургалтад оролцогчдод энэ үеэр онцлон анхааруулжээ.

Түүнчилэн сургалтад оролоцгчид барилгын хашлага бүтээцийн бүтэц, загвар, хашлага бүтээцийг эрчим хүчний хэмнэлтийн шаардлага хангахаар болгоход анхаарах зүйлүүд, хашлага бүтээцийн дулаан тусгаарлалт, дулаан тусгаарлалтад хэрэглэгдэх материалд тавигдах үндсэн шаардлага, хучилтын дулаан тусгаарлалт, Германд хэрэглэж байгаа барилгын дулаан техникийн тооцооны программ зэрэгтэй танилцсан байна.

Сургалтын төгсгөлд InWent байгууллага, зохион байгуулагч Идэа Консалтанс байгууллагууд сургалтын явц, хөтөлбөр, дараагийн сургалтын тухай санал солилцож сургалтад оролцогчдод гэрчилгээ гардуулжээ.