Монгол Улсын Ерөнхийлөгч Ц.Элбэгдоржийн Бүгд найрамдах Финланд улсад хийж буй айлчлалынхаа эхний өдөр Финландын Ерөнхийлөгч хатагтай Таръя Халонен, Ерөнхий сайд хатагтай Мари Кивиниеми нартай тус тус уулзаж ярилцлаа. Ерөнхийлөгч нар уулзалтынхаа дараа сэтгүүлчдэд мэдээлэл хийсэн юм. Энэхүү айлчлал нь хоёр улсын түүхэнд Монгол Улсын Ерөнхийлөгч Бүгд найрамдах Финланд улсад хийж байгаа анхны айлчлал гэдгээрээ онцлогтой байв. Хэвлэлийн хурлын төгсгөлд хатагтай Мари Кивиниеми ирэх жил Монгол Улсад айлчлах тухайгаа дуулгасан юм. Ерөнхийлөгч Ц.Элбэгдоржийн айлчлалын үеэр Финланд Улсын "Outotec" компани Монголын Үндэсний хөгжлийн корпорацитай Сайншанд хотод баригдахаар төлөвлөж буй зэс хайлуулах үйлдвэрийн техник, эдийн засгийн үндэслэлийг хийж гүйцэтгэх, хамтран ажиллах, технологийн шинэчлэлийн хүрээнд гарын үсэг зурлаа.

Энэ үеэр Финландын Экспортын зээлийн агентлаг Finnvera pls  болон Commerzbank АG нар зээлийн баталгаа гаргах, зээлийн санхүүжилт хийх сонирхлоо илэрхийлсэн захидалд гарын үсэг мөн зурлаа. Үндэсний хөгжлийн корпорацийн ТУЗ-ийн дарга Б.Батмөнх тус гэрээнд Монголын талаас гарын үсэг зурсны дараа цөөн асуултад хариу авсан юм. "Монгол Улс сүүлийн жилүүдэд олборлох салбарын хүрээнд нэлээн томхон төслүүд хэрэгжиж эхлээд байна. Үүнийг дагалдаад олборлох салбараас гарсан түүхий эдийг боловсруулж, хагас бэлэн болон бэлэн бүтээгдэхүүн үйлдвэрлэх шаардлага Монгол Улсын эдийн засгийн язгуур эрх ашигт нийцсэн зүйл гэж ойлгож байгаа. Өнөөдөр зурсан гэрээний гол агуулга бол Сайншандын аж үйлдвэрийн паркт барих зэс хайлуулах үйлдвэр байгуулахад "Outotec" компанитай хамтран ажиллах гэрээнд гарын үсэг зурлаа. Үйлдвэр байгуулснаар бид Оюу толгой болон бусад зэсийн уурхайгаас гарах зэсийн баяжмалаас цэвэр зэс ялган авч экспортлох, мөн зэсэн бүтээгдэхүүнийг үйлдвэрлэх хүнд аж үйлдвэрийн үндэс суурь бий болох эхний шат амжилттай эхэллээ.

Финландыг сонгосон гол үндэс гэвэл өнөөдөр дэлхий дээр хайлуулж байгаа зэсийн нийт баяжмалын 50 хувийг энэ компанийн гаргасан технологиор хийж байна. Тиймээс бид хүсэлт гаргасны эцэст хамтран ажиллах боллоо. Техник, эдийн засгийн үндэслэл нь урьдчилсан байдлаар хоёр сая тонн зэсийн баяжмалыг хайлуулж, 520 мянган тонн зэс гаргах тооцоо бий. Энэ бол дэлхийн зэсийн зах зээлд нэлээн том байр суурь эзлэх, олборлож байгаа салбараас гаргах бүтээгдэхүүний үнийг хянах боломҗтой болж байгаа" гэв.