Баянголын бизнесменүүд АҮ-ийн парктай болно
Barilga
2019-11-05
МАХН-аас өрнүүлж буй “Нийгмийн ардчилал” аяны хорёдугаар үе шат болох “Ард түмнээ сонсъё” аян Баянгол дүүрэгт болж, тус намын болон нийслэл, дүүргийн удирдлагууд оролцож, иргэдийнхээ үгийг сонслоо. Уулзалтын үеэр иргэд зөвхөн нэг намын улс төрийн үйл ажиллагаа төдийхнээр хязгаарлагдалгүй улс эх орон, иргэдийн амьдралд тулгамдаад буй асуудлуудын талаар санал бодлоо солилцож, бэрхшээлээс гарах гарц хайсан, ажил хэрэгч санаа өрнүүлсэн байна.
Тухайлбал, тус дүүрэгт бизнес эрхлэгчдийн цөөнгүй хэсэг нь ажлын байрны зориулалттай байргүй тул үйлдвэрлэл, үйлчилгээгээ орон сууцны подваль ашиглаж явуулдаг. Иймээс жижиг дунд бизнес эрхлэгчдэд зориулсан аж үйлдвэрийн парк байгуулах шаардлагатай байгааг онцолж байсан юм.
Тус дүүрэгт “Аж үйлдвэрийн парк” байгуулах ажлыг бизнес эрхлэгчид болон дүүргийн удирдлагууд ажил хэрэг болгох талаар хамтарч ажиллахаар болжээ. Мөн энэхүү уулзалтын үеэр иргэдээс гаргасан бусад санал хүсэлтийг холбогдох газруудад хүргүүлж, шийдвэрлүүлэхээр болсон байна. Тус дүүрэгт энэ онд 388 аж ахуйн нэгж, байгууллага, иргэдийн үүсгэсэн 2283 ажлын байр шинээр бий болгожээ. Ажил олгогч аж ахуйн нэгж, байгууллагаас 2131 ажлын байрны захиалга хүлээн авч, нийт бүртгэгдсэн 2102 ажилгүй иргэдээс 1858 хүнийг ажлын байраар хангасан байна. Мөн мэргэжил олгох болон давтан сургалтанд 850 иргэн суралцсанаас 47 хувь нь ажлын байртай болжээ.