Ажил хийх хугацаа багасч байгааг хотын дарга анхааруулав
Barilga
2019-11-05
Нийслэлийн нутгийн захиргааны байгууллагуудын удирдах ажилтны нэгдсэн шуурхай зөвлөлгөөн болж, цаг үеийн асуудлуудыг хэлэлцлээ. Шуурхай зөвлөлгөөнд танилцуулсан Нийслэлийн Хөрөнгө оруулалтын газар/НХОГ/-ын даргын мэдээллээр өнөө жил нийслэлд хэрэгжүүлэх хөрөнгө оруулалтын ажлын гүйцэтгэл энэ сарын 16-ны байдлаар 72 хувьтай байна. Нийт 25,8 тэрбум төгрөгийн төсөвт өртөг бүхий 264 ажлаас 229 нь гэрээ байгуулагдаж, одоогоор 125 ажил нь дуусчээ. Өнөө жил шинэчлэхээр төлөвлөсөн Улаанбаатар хотын нийтийн орон сууцны 36 лифт гадаадаас ачигдсан агаад 8,9 сард багтаан засварын ажлыг дуусгана гэдгийг НХОГ-ын дарга мэдэгдсэн байна.
Улаанбаатар хотын Ерөнхий менежерийн танилцуулснаар энэ сарын 15-ны байдлаар 2010-2011 оны Нийслэлийн өвөлжилтийн бэлтгэл ажлын хэрэгжилт 79,4 хувьтай байна. Өнгөрсөн жил улсын төсвийн хөрөнгөөр хийгдэж эхэлсэн дулааны шугамын засварын ажлын 2 дугаар ээлж болох их тойргийн магистраль шугамын засвараас өнөөдрийн байдлаар 8-н хэсэгт засварын ажил дуусчээ.
Улаанбаатар хотын цахилгаан дамжуулах сүлжээнд хийгдэх 35 кв-ын агаарын шугам болон дэд станцуудад засвар шинэчлэлтийн ажлууд 83,8 хувьтай байна. Мөн Ус сувгийн удирдах газраас бохир усны 148 км шугамд угаалга хийж, одоо Нийтийн аж ахуйг сайжруулах төслийн хүрээнд Баянхошууны хойд хэсэг, Дарь-Эх, Дамбадаржаагийн гэр хорооллын усан хангамжийн системийн туршилт тохируулгын ажлыг хийж байгаа ажээ.
Нийслэлийн Боловсролын газрын даргын танилцуулснаар 2010-2011 оны хичээлийн шинэ жилийн бэлтгэл ажлын хүрээнд улсын төсвийн хөрөнгөөр 9 сургууль, 7 цэцэрлэгт засвар хийгдэж байгаагаас 13 нь бүрэн дуусчээ. Шинээр баригдаж байгаа 12 цэцэрлэг, мөн 5 цэцэрлэгийн өргөтгөл энэ ондоо ашиглалтад орох бөгөөд ингэснээр цэцэрлэгийн хүчин чадал 1200 ороор нэмэгдэх юм байна.
Цаг үеийн бэлтгэл ажлын талаарх эдгээр мэдээллийг сонссоны эцэст хотын дарга аль ч чиглэлээр ажил хийх хугацаа багасч байгааг дор бүрнээ анхаарч, ажлаа эрчимжүүлэхийг үүрэг болгоод, хийгдэх ажлуудыг жагсаалтаар гаргаж, доголдож байгаа, хэрэгжилт нь удааширсан ажлууддаа анхаарал тавихыг даалгалаа. Мөн 10 дугаар сарын 1 гэхэд хөрөнгө оруулалтаар хийгдсэн ажлуудын гүйцэтгэл тодорхой болж, хэн нь ямар ажил хийсэн бэ гэдэг ойлгомжтой болох үеэр гүйцэтгэгч тус бүрээр иргэдэд хийсэн ажлыг нь танилцуулна гэдгээ хотын мээр онцлон дурдсан байна.