-ТӨР, ЗАСАГ ҮНДЭСНИЙ ҮЙЛДВЭРЛЭЛ ДЭМЖИВ-

 

"Монполимет" групп "Монцемент” төсөл боловсруулсныг ЭБЭХЯ-ны дэргэдэх Эрдэс баялгийн мэргэжлийн зөвлөл энэ сарын 17-ны өдрийн хуралдаанаараа авч хэлэлцэн уг төслийн Техник, эдийн засгийн үндэслэл (ТЭЗҮ)-ийг баталлаа. Үүнийг төр, засгаас үндэсний компаниудаа эцсийн бүтээгдэхүүн хийж, нэмүү өртөг бүтээхийг тодорхой хэмжээгээр дэмжиж байгаагийн нэг илрэл гэж үзэж болохоор, Ингэснээр монголчууд өөрсдийн хүчээр дотооддоо цемент үйлдвэрлэж гаднаас худалдан авдгаа болих боломжтой болж байна. Өөрөөр хэлбэл цементийн үйлдвэрлэл дотооддоо нэгээр нэмэгдлээ гэсэн үг. Энэ талаар зөвлөлийн хуралд суусан ШУТИС-ийн Уул уурхай, инженерийн сургуулийн захирал, доктор, профессор Л.Пүрэвтэй уулзаж түүний үгийг сонслоо.

 

-ЭБЭХЯ-ны Эрдэс баялгийн зөвлөл гэдэг тухайн салбарын мэргэжилтнүүд оролцдог том зөвлөл юм. Үүгээр Дорноговь аймаг дахь Сэнжит худгийн шохойн чулууны ордыг олборлох уурхай барих, мөн тэнд цементийн үйлдвэр байгуулах гэсэн хоёр төслийг зөвлөл хэлэлцэж баталлаа. Энд сууж байсных дотоодын компани үндэсний үйлдвэрлэл хөгжүүлэхэд өөрөө хөрөнгө оруулаад гадаадаас худалдаж авдаг бүтээгдэхүүнийг эх орондоо үйлдвэрлэх үйлдвэр барьж байна гэдэг том ажил. Энэ утгаар зөвлөлийнхөн төслийг нааштай хүлээн авч цаашид хөгжүүлье гэдэг үүднээс хангалттай үнэлэлт дүгнэлт өглөө. Зөвлөлийн гишүүд нэлээд сэтгэл хангалуун байлаа гэж үзэж байгаа.

 

-Цемент бол барилгын гол материал. Уул уурхайн талаас аваад үзвэл манай улсад урьд нь ажиллаж байсан үйлдвэрийг үргэлжлүүлэн ажиллуулж байгаа гэхээс биш миний мэдэхийн чулуун ордыг ингэж шинээр олборлоод, өөрсдийн хүчээр цементийн үйлдвэр байгуулаад, эцсийн бүтээгдэхүүн хийж гаргах гэж байгаа газар өмнө нь байгаагүй. Энэ утгаараа "Монполимет" групп цемент дээр анх удаа эцсийн бүтээгдэхүүн гаргах үйлдвэр байгуулах гэж байна. Үүгээрээ онцлог, улс орны барилгын салбарын хөгжилд томоохон хувь нэмэр оруулж байгаа үйл ажиллагаа гэж ойлгож байгаа. Нөгөө талаар хувийн компани ийм том хоёр үйлдвэрлэлийг нэг цаг үед барина гэдэг их том үйл ажиллагаа юм. Энэ нь Монгол орны эдийн засгийн хөгжилд тодорхой нөлөө үзүүлэх нь дамжиггүй, Юу гэвэл өнөөдөр манайд уул уурхай, барилгын салбар эрчимтэй хөгжиж байгаа. Ийм хоёр том салбарт үйл ажиллагаа явуулах үйлдвэр байгуулах гэж байна. Өнөөдөр Монголд эцсийн бүтээгдэхүүн гаргах үйлдвэр чухал байгаа. Үүнийг манайхан зэс хайлуулах үйлдвэрээр жишээ авахад тэр нь УИХ-аар орж, Засгийн газар нь дэмжээд дээр дооргүй л ярьж байна. Тэгэхээр цементийн энэ үйлдвэр байгуулагдсанаар орон нутгийн хөгжилд их том хувь нэмэр болох юм. Орон нутгийн төсөв тодорхой хэмжээгээр нэмэгдэх зэргээр аймаг, орон нутгийн хөгжилд их нөлөө үзүүлнэ. Тэр хэмжээгээр нутгийн хүмүүсийн амьдрал ахуй дээшилнэ. Нөгөө талаар ажлын байр нэмэгдэнэ. Манайх уул уурхайн чиглэлээр мэргэжилтэн бэлтгэдэг сургуулийн хувьд төгсөгчдөө яаж ажлын байраар хангаж ажилтай болгох вэ гэдэг дээр үргэлж санаа зовж байдаг. Оюутнууд маань ажлын байртай, ажиллах байртай болж байвал бидний зорилго биелж байна гэсэн үг. Энэ утгаар хоёр том үйлдвэр ашиглалтад орно гэдэг уул уурхайгаар төгсч байгаа хүүхдүүд уурхайд нь, барилгын чиглэлээр төгсч байгаа нь цементийн үйлдвэрт ажиллана гэсэн үг. Мөн орон нутгийн залуусыг энэ чиглэлээр бэлтгэж болно. Ийм олон талын ач холбогдолтой.

 

-Барилгын үйлдвэрлэл эрчимтэй хөгжиж байгаа үед цементийн эрэлт, хэрэгцээ дагаад хөгжих нь ойлгомжтой. Одоо манайд ажиллаж байгаа үйлдвэрүүд дотоодын хэрэгцээгээ бүрэн дүүрэн хангаж чадахгүй байгаа шүү дээ. Тиймээс ихэнхдээ гадаадаас, ялангуяа Хятадаас цемент зөөж авч байгааг хүн бүр мэднэ. Дотооддоо цементийн үйлдвэр байгуулагдаж байна гэдэг импортыг орлох үйлдвэр байгуулахыг эрмэлзэж байгаа төр, засгийн бодлого, шийдвэрт нийцэж тэр нь тодорхой хэмжээгээр биелж байна гэсэн үг. Нэг ёсондоо гаднаас авах юмаа аль болох багасгаж, түүнийгээ дотооддоо үйлдвэрлэж байвал бид цаашдаа хөгжих ирээдүйтэй гэдэг нь хэнд ч ойлгомжтой шүү дээ. Тийм учраас улс орны эдийн засгийг бодсон ч их ач холбогдолтой юм. Цаашдаа хувийн компаниуд ийм төрлийн үйлдвэрүүдийг хөгжүүлж байвал их сайн байна. Тодруулга: "Монполимет" групп нь Дорноговь аймгийн Өргөн сумын нутагт орших Сэнжит худгийн шохойн чулууны ордод сүүлийн таван жил геологийн нарийвчилсан хайгуул, судалгааны ажил хийж, эхний ээлжинд 12 сая тонн бодит нөөц, 55 сая тонны урьдчилан үнэлсэн нөөцүүдийг тус тус тогтоож, ийнхүү Эрдэс баялгийн зөвлөлөөр батлуулаад байна. Ингэснээр байгаль орчинд хор хөнөөлгүй, сүүлийн үеийн дэвшилтэт хуурай аргын бүрэн автоматжсан технологитой, стратегийн ач холбогдол бүхий цементийн үйлдвэр байгуулахаар болж, бэлтгэл ажлаа эхлээд байна.