Хотын дарга Налайх дүүрэгт ажиллах үеэрээ УИХ-ын зарим гишүүд, холбогдох яамдын дэд сайд нарын хамтаар Шивээтийн хөндийд сүндэрлэх оюутны хотхоны газар, байрлалтай танилцлаа. Налайхаас цаахантай Гордокийн зүүн урд орших Шивээтийн хөндийн тэгш дэвсэг бүхий 1000 га газарт  эрдэм шинжилгээний сургалтын төв, оюутны хичээлийн болон дотуур байр бүхий оюутны хотхоныг барих юм. Сургалт, эрдэм шинжилгээ, үйлдвэрлэл хосолсон, дэлхийн жишигт нийцсэн энэхүү оюуны хотхоныг байгуулахад 300 орчим тэрбум төгрөг шаардлагатай байгаа.

БСШУЯ-ны Төрийн нарийн бичгийн даргын хэлснээр тус яамны сайдын ахалсан “Оюутны хотхон байгуулах” ажлын хэсгийнхэн энэ сард багтаагаад зураг төслийг бэлэн болгох аж. Албаны хүмүүсийн хэлж байгаагаар бол бага хэмжээний дулааны станц юмуу халаалтын зуух барих, эсвэл Улаанбаатараас Налайхруу татах шугам сүлжээтэй хамтатгах зэргээр дэд бүтцийн асуудлыг иж бүрнээр нь шийдвэрлэхэд дөхөмтэй, боломжтой газар гэж үзэж байгаа юм.

Улаанбаатар