“Мишээл экспо” төвийн үзэсгэлэнгийн танхимд 6 сарын 22-ноос 6 сарын 25-ны өдөр хүртэл 4 өдөр үргэлжилсэн “Шинэ байшин-Шилдэг тохижилт” сэдэвт үзэсгэлэн яармаг өчигдөр хаалтаа хийлээ. Монгол улсын Засгийн газраас 2007 оныг “Их бүтээн байгуулалтын жил” болгон зарласан. Мөн иргэд ч барилгын материал сонгон авах, урт хугацаатай орон сууцны зээлд хамрагдах талаар ихээхэн сонирхож байгаа энэ үед жилийн хүрээнд гаргаж буй томоохон үзэсгэлэнгийн нэг боллоо.
Барилга угсралтын байгууллагуудаас эхлээд барилгын материал үйлдвэрлэгч, импортлогчид, барилга орон сууцны хөрөнгө оруулагчид зэргийн 80 гаруй байгууллагууд оролцсон бөгөөд үзэсгэлэн үргэлжлэх хугацааны туршид 7500 гаруй хүн үзэж сонирхжээ.
Их барилгын салбарт өөрсдийн хувь нэмрийг оруулж буй дараахь аж ахуйн нэгжүүд үзэсгэлэн яармагийн шилдэгүүдээр тодорчээ. Барилгын биржээс шилдэг оролцогчоор “BBL” ХХК, “Мон Хорус интернэшнл” ХХК, “Welltak” ХХК, “Их цагаан хэрэм” ХХК-уудыг шалгаруулсан бол Стандартчилал хэмжил зүйн үндэсний төвийн өргөмжлөлийн эзнээр “Заг” ХХК, “ТехноНиколь Монголия” ХХК, “Их цагаан хэрэм” ХХК-ууд тус тус тодорсон байна.