“Үндэсний цэцэрлэгт хүрээлэн”-д хөрөнгө оруулалт хийж, ой байгуулах гэнэ. Энэ тухайгаа НҮБ-ын Байгаль орчны хөтөлбөрийн БНСУ-ын үндэсний хорооны нарийн бичгийн дарга Жае Бум Ким Нийслэлийн Засаг даргын орлогч Д.Ганболдтой уулзахдаа хэлжээ. Тэрбээр “Монголд анх 2002 онд ирж байлаа. Тэр үеэс Улаанбаатар хот их өөрчлөгджээ. Бүтээн байгуулалт ид өрнөж, дэд бүтэц хурдацтай хөгжсөн байна. Хөгжихийн хэрээр ногоон байгууламжаа нэмэгдүүлэх нь чухал. Энэ бүхэнд бид хамтарч ажиллах болсондоо таатай байна” гэж хэлсэн аж.

 

Дашрамд сонирхуулахад БНСУ хоёр Солонгосын дайны үед уул толгод нь хувхайрч, ой модгүй болж байсан гашуун түүхтэй ч 1960-1970 оны үед ногооруулах, ойжуулах үндэсний хөтөлбөр зарлаж, ойн байцаагчдадаа тодорхой хэмжээний эрх мэдэл олгосны үндсэн дээр газар нутгийнхаа дийлэнхийг ойжуулж чадсан туршлагатай юм байна. Тэр ч утгаараа бидэнд тусалж, “Үндэсний цэцэрлэгт хүрээлэн”-д эхний ээлжинд 20 орчим га талбайд 6500 гаруй мод, бут, сөөг тарихаар болсон байна. Цаашдаа га талбайн хэмжээг нэмж, бүхэл бүтэн ой байгуулах төлөвлөгөөтэй байгаагаа уулзалтын үеэр мэдэгдсэн. Түүнчлэн БНСУ-ын үндэсний хороо, Улаанбаатар хоттой байгаль экологийн тулгамдсан асуудлууд болон үндэсний цэцэрлэгт хүрээлэн бүтээн байгуулалтын ажилд цаашид өргөн хүрээтэй хамтран ажиллах санамж бичигт гарын үсэг зурсан байна.

 

Монцамэ