Монголын бизнесийн үйлчилгээний зах зээлд өөрийн гэсэн орон зайтай болоод буй  “ЭМ АЙ СИ ЖИ”  ХХК-ийн ерөнхий захирал, залуу мэргэжилтэн Б.Билэгтсайхантай ярилцлаа. Бидний яриа  зах зээлийн судалгаагаар ажиллахын  онцлогын тухай голчлон өрнөсөн юм.

 

-Өөрийгөө манай уншигчдад товч танилцуулахгүй юу?

- Намайг Б.Билэгтсайхан гэдэг. СЭЗДС-ийг бизнесийн эдийн засагч мэргэжлээр төгссөн.  “Хадгаламж” банк, “Нью Прогресс” групп зэрэг байгууллагуудад эрсдлийн шинжээчээр ажиллаж байсан.  Өдгөө ““ЭМ АЙ СИ ЖИ”  ХХК-г удирдаад ажиллаж байна даа.

 

- Өөрийгөө сорьж бизнес, тэр дундаа судалгааны бизнес хийх болсон шалтгаан юу вэ?

- Би залуу хүн учир магад миний хэлэх зүйл даруу бус санагдаж болох байх л даа.Гэхдээ  бизнесийг дэмжих үйлчилгээний салбарын чиглэлээр Монголд хийх зүйл их байна. Бидний ажил  нэг талаар бизнес хэдий ч нөгөө талаар бусад бизнесийн байгууллагад буян болдог их сайхан ажил шүү дээ. Зах зээлээ таниагүй бизнес эрхлэгчдэд хэрэгтэй бүх судалгаа, төлөвлөлтийг хийж өгдөг. Зарим жижиг бизнес эрхлэгчид маань бүтээгдэхүүн, үйлчилгээг хийхээс цаадхыг мэддэггүй. Яаж маркетинг хийх вэ? Хэрэглэгчдээ татах, борлуулах аргаа мэддэггүй.

Харин зах зээлд аль хэзээ хөлөө олсон компаниудын хувьд хэрэглэгчид хэрхэн өөрчлөгдөж байгаа вэ? Бид зах зээлийн хаана явна вэ? Цаашдаа ямар замаар явах талаар хариултаа биднээр судалгаа хийлгэж авдаг. Тэгэхээр судалгаа ямар үнэ цэнэтэй болох нь ойлгомжтой.

 

- Бизнес эрхэлж буй залууст мэдээж олон бэрхшээлтэй асуудал тулгардах байх?

- Манай ажил зарим бизнесийн байгууллагаас арай өөр. Өөрөөр хэлбэл цаг ямагт шинийг эрэлхийлж, мэдэрч хөдөлдөг, уян хатан, эрч хүчтэй байхыг шаардаж байдаг. Хоёр сарын хугацаанд нэгэн төсөл, судалгааны ажлыг дуусгалаа гэхэд энэ хугацаанд тухайн зах зээлийн талаар өргөн мэдлэгтэй болсон байдаг. Дараа нь дахиад шинэ зах зээл, шинэ бизнес, шинэ боломжуудыг эрэл хайгуул хийж судласаар байдаг. Нөгөө талаар их сонирхолтой, хувь хүнийг их хөгжүүлдэг салбар гэж ойлгодог.

 

- Ер нь Монголын бизнес эрхлэгчид судалгааны үнэ цэнийг хэр ойлгодог болсон байна вэ?

- Би судалгаагүй бизнес бол нүдээ боогоод алхаж байгаатай зүйрлэмээр байна. “Япон бизнес эрхлэгчид, менежерүүд ажлыг 80 өдөр бодож төлөвлөөд 1-өдөр хийдэг бол Монгол хүмүүсийн хувьд 1-өдөр бодоод 80 өдөр түүнийхээ төлөө явдаг” гэсэн яриа бий. Сүүлийн үед энэ хандлага эрс өөрчлөгдөж байна. Цаашдаа судалгааны үнэ цэнийг илүү ойлгодог, бизнесийн байнгын хэрэглээ болно гэдэгт итгэдэг шүү.

 

- Миний бодлоор бизнес бол чөлөөт зарчмаар тулалдаж буй дайн. Яагаад гэвэл дайн, бизнесийн үндсэн зарчмууд адилхан. Өрсөлдөөн, амьд үлдэх, оршин тогтнохын төлөөх тэмцэл, өрсөлдөгчөө судлах, ялалтын төлөвлөгөө, стратеги боловсруулах бүгд яг адил.

21-р зуунд улс орны эдийн засаг , хүн ардын амьдралд шийдвэрлэх нөлөө үзүүлдэг салбар нь бизнесийн салбар болжээ. Нэг томоохон компани дампуурахад  ажилгүйдэл, ядуурлаас эхлээд асар олон асуудал нийгэмд тулгарч байна. Тиймээс бизнесийн хөгжил улс орны ирээдүйд чухал үүрэгтэй.

 

-Тэгвэл бизнесийн хөгжилд хамгийн чухал нь юу вэ?

- Ихэнх хүмүүс бизнест хөрөнгө, санхүүжилт хамгийн чухал гэж боддог. Гэвч энэ нь дангаараа тийм ч чухал биш.  Мөнгийг хөдөлгөөнд оруулж арвижуулах зорилго бүхий менежмент, маркетинг, хийх ажлын нарийнвчилсан төлөвлөгөө буюу бизнес төлөвлөлт хамгийн чухал гэж хэлмээр байна. Жилийн дараа нөхцөл байдал хэрхэн өөрчлөгдөх, өөрийн бизнесийн амжилт ямар түвшинд хүрэх, зах зээлийн хэдэн хувийг эзэлж, санхүүгийн хэр зэрэг хүчирхэг болох эсэхэд төлөвлөлт хийх хэрэгтэй.

Бизнес төлөвлөгөөг барилгын зураг төсөлтэй адилтгаж үзэж болно. Байшинг барихад зураг төсөл заавал хэрэгтэй. Зураг төсөлгүй байшин удаан наслаж амьдарч чадахгүй, чанар нь муудна, нурна.

 

-Жижиг дунд бизнесийнхэн бизнес төлөвлөгөөг хийх хэрэгтэй нь ойлгомжтой. Одоо тэд ямар зорилгоор бизнес төлөвлөгөөг хийж байна вэ? Тогтмол хийж чадаж байна уу?

-Манай жижиг дунд бизнес эрхлэгчид маань үйл ажиллагааны бизнес төлөвлөгөө, маркетинг, идэвхижүүлэлтийн төлөвлөгөөг хараахан тогтмол хийж хэвшээгүй байна. Зарим нэг нь зөвхөн хэрэгцээ гарсан үед, бэлэг тэмдэг байдлаар хийх нь ч бий. Зүй нь 3-5 жилийн үйл ажиллагааныхаа нарийвчилсан бизнес төлөвлөгөөг гаргачихаад нэгэн зорилгын төлөө бүгд зүтгэх ёстой. Томоохон байгууллагуудын хувьд бол энэ байдал эрс өөр л дөө.

 

-“ЭМ АЙ СИ ЖИ” ХХК-ын ажиллах хүч боловсон хүчний талаар?

- Компанийн үндсэн удирдлагад 3 хүн байдаг. Удирдлагын ажилчдаас гадна эдийн засаг, бизнесийн удирдлагын мэргэжлийн 4 ажилтантай. Манайх чадварлаг цөөн ажилчдын баг бүрдсэн шүү. Нийгмийн идэвхи сайтай, бүтээлч залуус ажилдаг. Бид байгаль орчны эдийн засаг, “Экологийн хямрал”, “Сэргээгдэх эрчим хүч”, “Аялал жуулчлалын цогцолбор”-ын хөрөнгө оруулалтын төсөл зэрэг нарийн мэргэжил шаардсан ажлууд дээр тухайн чиглэлийн доктор, пропессоруудтай хамтарч ажилласан.

 

-Танай хамгийн сүүлд хийж гүйцэтгэсэн ажлуудаас дурдаач?

- Манай салбарын бас нэг онцлог бол гэрээ хийсэн бол хийсэн ажлаа бусдад мэдээлэх эрхгүй байдаг л даа. Гэхдээ ерөнхийд нь хэлье. Хамгийн сүүлд “Зөгийн аж ахуйн үржүүлэг”, “Зөгийн балний үйлдвэрлэл”-ийн хөрөнгө оруулалтын бизнес төсөл дээр ажилаад дууслаа. Одоогоор 2010 онд нээлтээ хийх “…” бүрэн хэмжээний кино зах зээлд гаргах бизнес төсөл, “…” цоо шинэ мэдээллийн сонин гаргах хөрөнгө оруулалтын бизнес төсөл дээр ажиллаж байна.

 

- “MICG” ХХК буюу “Marketing Investment Consulting Group” ХХК-ийн цаашдын зорилго?

Манай компани Монголын бизнесийг дэмжих үйлчилгээний зах зээлд үндсэн үйл ажиллгаагаараа өөрийн хувь нэмрээ оруулах эрхэм зорилгын төлөө ажилдаг. Энэхүү зорилгоо биелүүлэхийн төлөө Бодлогын судалгаа, Олон улсын төсөл хөтөлбөрүүд, Улсын хэмжээний нийгэм, эдийн засгийн суурь судалгаануудад мөн түлхүү ажиллах зорилт тавин ажиллаж байгаа.

 

-Ярилцлага өгсөн таньд баярлалаа. Цаашдын ажил, амьдралд чин амжилт хүсье.

-Баярлалаа. Танай хамт олонд ажлын өндөр амьжилт хүсэн ерөөе.

Тус компаний тухай илүү ихийг мэдэхийг хүсвэл  www.micg.mn сайтад зочлоорой.