АНУ-ын нийслэлд амьдардаг монголчууд Вашингтон хотод Чингис хааны хөшөөг босгохоор санаачилсан явдал сүүлийн хэдэн өдөр дэлхийн хэвлэл мэдээллийн хуудаснаас салсангүй. Санаачлага төдий ч биш АНУ-д суугаа Монголын ЭСЯ-ны дэмжлэгийг шууд авч хэдийнэ ажил хэрэг болж хувираад буй тухай нь ялангуяа Америкийн хэвлэлүүд дуу дуугаа авалцан мэдээлж байна. Хэвлэлүүд АНУ-д суугаа манай ЭСЯ-ны ажилтнууд, Америкийн өнцөг булан бүрт амьдарч буй монголчууд, монгол болон Азийг судлаач эрдэмтэд гээд олон арван хүнээс зогсоо зайгүй ярилцлага авч Чингисийн хөшөөг Вашингтонд босгох асуудалд хэрхэн хандаж байгааг нь асууж нийтэлж байгаа юм. “Хоёр ондоо соёлтой ард түмнүүд бие биенээ улам бүр танин мэдэх нь тун чухал бөгөөд энэ хөшөө босвол уг зорилгод хүрэх нэг том алхам болно” гэж консул Г.Ганболд “USA Today” сонинд ярилцлага өгөхдөө ярьсан бол ЭСЯ-ны ажилтан С.Даваадаш “Вашингтонд монголчууд бас ажиллаж амьдарч байгаа юм шүү гэдгийг энэ хөшөө улам тодотгож өгнө” гэжээ.  Америкийн Үндэсний Түүхийн Мүзэйн салбарын захирал Уильям Фицью “Нью-Йорк Таймс” сонинд сүүлийн 5 жилийн Монголын талаар судалгаа хийж байгаагаа яриад монголчуудын элгэмсүү, найрсаг занг магтжээ. Гэхдээ “Дайнч гэдгээрээ нэр цууд гарсан хүний хөшөөг Вашингтонд босгох нь зүй зохисын хувьд ямар бол” гээд “Шашныг үл ялгаварлах, эмэгтэйчүүдийн эрх, дипломат халдашгүй ёс зэрэг олон дэвшилтэт шинэчлэлийг Чингис нэвтрүүлсэн гэдгийг мартаж болохгүй” гэсэн байна. Хөшөө барих зөвшөөрөл, газрын асуудал одоогор эцэслэн шийдэгдээгүй байна. Зарим эх сурвалжийн мэдэлсэнээр Монголын ЭСЯ-наас хотын холбогдох албаны хүмүүст уг асуудлаар хүсэлт гаргасан байна. Вашингтоны хувьд газрыг хотын ба улсын мэдлийн хэмээн хоёр ангилдаг бөгөөд уг хөшөөг ЭСЯ-ны ойролцоо байгуулах гэж байгаа бол хотын захиргаанаас зөвшөөрөл авах ёстой аж. Вашингтон дүүргийн хот төлөвлөлтийн газрын ажилтан Майкл Жонсоны хэвлэлийнхэнд ярихдаа, Чингис хааны хөшөөний хувьд албан ёсны шийдвэр одоогоор гараагүй байгаа тул тухайлан хэлэх зүйлгүй гээд хаанахын хүний хөшөөг барих тухайд гэвэл хотын захиргаа, гадаад хүн гэхээс илүүгээр америк хүний хөшөөг онцгой чухалчилж үзнэ гэж мэдэгджээ. Вашингтонд америкчуудаас гадна гадаадынханд зориулсан хөшөө дурсгал цөөнгүй бий юм. Уинстон Черчиллийн хөшөөг Их Британийн ЭСЯ-ны өмнө босгосон бол Энэтхэгийн тусгаар тогтнолын эцэг Махатма Гандийнхийг энэтхэгчүүд мөн Яамныхаа ойролцоо барьсан бий. Мөн Вашингтоны хамгийн өндөр хөшөөний нэг нь өмнөд америкчуудын үндэсний баатар Симон Боливарынх байна. Цаашилбал франц Жанна Д’Арк, украин Тарас Шевченко, уругвай Хосэ Артигас нарын хөшөө Вашингтонд бий ажээ.