“Үндэсний соёл амралтын хүрээлэн” таван жилийн дараа бүрэн хэмжээгээр ашиглалтад орно гээд байгаа. Харин АНУ, Испани, Тайвань, Хятад, Оросоос авчирсан 11 тоглоомыг суурилуулсан эхний ээлж ашиглалтад ороход найман хоног үлдээд байна.

      Тавдугаар сарын сүүлчээр хотын мэр Г.Мөнхбаяр хүүхдийн паркад гэнэтийн айлчлал хийсэн. Тэр үеэр “Үндэсний соёл амралтын хүрээлэн” ХХК-ийн дэд захирал, төслийн удирдагч Б.Батнягт “Зургадугаар сарын 1-нд бол амжихгүй, ирэх долдугаар сарын 8 гэхэд эхний ээлжээ ашиглалтад оруулна.

      Шинэчлэлтийн ажил 70 хувьтай явж байгаа. Тоглоомууд ерөнхийдөө бэлэн болчихсон. Гэхдээ дор хаяж 20 хоног тоглоомоо туршиж, тохиргоог нь хийх ёстой. Одоо бол тоглоомын эргэн тойрны тохижилт, ногоон байгууламж үлдээд байгаа. Хөрсөө суулгах, асфальтан хучилт хийж, явган хүний зам тавих зэрэг ажлууд хийж эхлээд байна. Эхний ээлжинд найман га газарт суурилуулсан 11 тоглоомыг ашиглалтад оруулна” хэмээн Г.Мөнхбаяр даргад амалсан. Амалсан ёсоор бол хүүхдүүд удтал хүлээсэн хүүхдийн паркдаа тун удахгүй тоглох нь ээ.