Өнгөрсөн жил наадмын дараа айлууд нь үерт автаж их хэмжээний хор хохирол дагуулсан нийслэлийн Баянзүрх дүүргийн 13, 14 хорооны нутаг дэвсгэр болон Хан-Уул дүүрэг Биокомбинатад үерийн хамгаалалтын түр барилга байгууламж барих шаардлагатай байна. Энэ ажилд эхний ээлжинд 572 сая төгрөг хэрэгтэй. Үүнээс 475 сая төгрөгөөр нь 8 байгууламжид зураг төсөв хийгдэж улмаар шороон далан байгуулах талаар Улаанбаатар хотын Ерөнхий менежер Ч.Бат мэдээлэл дуулгалаа.

 

Өнгөрсөн жил 7-р сарын 18-22-нд үргэлжлэн орсон аадар борооны гол талбар нь Баянзүрх дүүргийн 13, 14-р хороо байлаа. Эдгээр хороонд 2000 гаруй айл өрх бий. Газар нь тэгш болохоор үер буулаа гэхэд урсдаггүй, жорлон нь хөвж гарч ирдэг байна. Ийм болохоор учирч болзошгүй дараагийн аюул ослоос урьдчилан сэргийлэх үүднээс энэ ажлыг хийхээр танилцууллаа. Зөвлөлийн гишүүд саналаа хэлсний дараа Нийслэлийн Засаг дарга бөгөөд Улаанбаатар хотын захирагч Г.Мөнхбаяр шаардлагатай хөрөнгө мөнгийг гаргах нь зүйтэй гэж хэлж байна. Сүүлийн жилүүдэд үерийн хамгаалалтын даланд хөрөнгө мөнгө зарцуулаагүйн хор хохиролыг өмнөх жилүүдэд хангалттай амссан болохоор хот зориг гарган хөрөнгө мөнгө шийдвэрлэх учиртай гэж хэллээ. 

 

Үерийн хамгаалалтын далан хагас тэрбум байтугай хэдэн арван тэрбумаар хэмжигддэг. Тийм болохоор төсвийн тодотголоор оруулахаар болж байна. Цаашдаа жил бүр далан барих ажилд мөнгө тусгаж байхаар тогтлоо. Энэ хурал дээр Нийслэлийн татварын газрын дарга С.Энхбаатар орлогоо нэмэгдүүлэх үүрэг даалгавар авсан бол нийслэлийн санхүү төрийн сангийн газрын дарга Э. Ганхүү төсөвт гэнэт ачаа үүрүүлж төсөл оруулж ирдэгийг шүүмжиллээ. Харин Нийслэлийн Чингэлтэй дүүргийн Засаг дарга Д.Ганболд манай дүүрэг ч бас үерт өртөмхий хөрөнгө мөнгө илүүчилж болдоггүй юм уу гэж барьцлаа.