Сүүлийн жилүүдэд дархан цаазат Богд хан ууланд газар эзэмшиж орон сууц болон хувийн байшин барих, аялал жуулчлалын зориулалтаар авсан газраа зориулалтын бус ашиглах зэрэг зөрчил хэрээс хэтэрсэн гэхэд болно. Энэ талаар өмнө нь олон сонин хэвлэлээр ярьж бичиж байсан боловч тодорхой үр дүнд хүрдэггүй байв. Тэгвэл Байгаль орчин аялал жуулчлалын яам энэ бүх хууль зөрчсөн асуудлыг шийдэх эхний алхамыг хийлээ. Тодруулбал, салбарын сайдын энэ сарын 27-ны өдрийн А-160 тоот тушаалаар Богд хан уулын дархан цаазат газрын хамгаалалтын бүсэд газар ашиглах 59 эрхийг цуцалсан байна. Уг шийдвэрийг гаргахдаа Мэргэжлийн хяналтын ерөнхий газраас ирүүлсэн байцаагчдын дүгнэлтийг үндэслэжээ. Өөрөөр хэлбэл, хүндэтгэн үзэх шалтгаангүйгээр гэрээнд заасан зориулалтын дагуу тухайн газраа хоёр жил буюу түүнээс дээш хугацаанд ашиглаагүй, газрын төлбөрөө хугацаанд нь хийгээгүй, гурвалсан гэрээнд заасан үүргээ биелүүлээгүй иргэн, аж ахуйн нэгжийн газрын зөвшөөрлийг цуцалсан байна.