Засгийн газрын ээлжит хуралдаанаар Оюутолгой, Тавантолгой, Сайншанд, Цогтцэций, Хөшигтийн хөндийн ойролцоох газруудыг улсын тусгай хэрэгцээнд авахаар боллоо. Энэ талаар ЗТБХБ-ын сайд Х.Баттулга мэдээлэл хийсэн юм.

    Тэрбээр, Засгийн газрын хуралдаанаас стратегийн орд газарт хамаарагдаж байгаа Тавантолгой, Оюутолгой, Цогтцэций, Сайншанд, Хөшигтийн хөндий зэрэг томоохон бүтээн байгуулалтын ажил хийх газруудыг төр хувь хүн, аж ахуйн нэгжүүдэд олгохгүй гэсэн шийдвэрийг гаргалаа. Учир нь Оюутолгой, Тавантолгойг эдийн засгийн эргэлтэд оруулахад эргээд хотжих хөдөлгөөн бий болно. Наанадаж 50 жилээс дээш хотжих хөдөлгөөн бий болно гэж үзэж байгаа. Тиймээс одооноос эхэлж, газрын асуудлыг баталгаажуулж авах хэрэгтэй байгаа юм. Тухайн газрыг орон нутаг нь мэдээд бусдад өгчихдөг болохоор төр тухайн газрыг авсан хүмүүстэй ярих гэхээр наймаалцах хэрэг гардаг байдлаас урьдчилан сэргийлж ийм арга хэмжээ авч байгаа юм гэж салбарын сайд мэдээллээ.

    Харин дээрх газарт хэдэн аж ахуйн нэгжтэй холбоотой газар олгогдсон асуудал хөндөгдөж байгаа ч үүнийг холбогдох хууль тогтоомжийн хүрээнд шийдэх боломжтой гэдгийг Х.Баттулга сайд хэлж байна.   Харин үүнд шаардагдах хөрөнгийн тооцоо ирэх сарын 1 гэхэд гарах аж.

    Дорноговь аймгийн Сайншанд сумын нутагт аж үйлдвэрийн цогцолбор байгуулахаар төлөвлөсөн 3512.5 га, Өмнөговь аймгийн Ханбогд сумын нутаг- Оюутолгой орд орчмын 7736.1 га, Цогтцэций сумын Тавантолгойн орд газар орчмын 3661.3 га, Дорноговь аймгийн Замын-Үүд сумын нутагт орших 882.3 га, Төв аймгийн Сэргэлэн сумын Хөшигтийн хөндийд баригдах "Олон улсын нисэх онгоцны буудал"-ын дэвсгэр нутагт орших 12084.9 га газрыг тусгай хэрэгцээний газарт хамааруулахаар болжээ.