Польш улсын нийслэл Варшав хотод 20.5 м2 байрыг хүүгийн хамт амьдардаг нэгэн залуу хэрхэн тохижуулсныг та бүхэндээ сонирхуулъя. Уг тохижуулалтыг хийхэд 6 мянган евро зарцуулсан бөгөөд 3 сарын хугацаанд хийж гүйцэтгэсэн байна.

Энэхүү Tamka нэртэй сууцны нөхцөл сайжруулах төслийг Centrala хэмээх дизайны студийн архитекторууд хийж гүйцэтгэсэн байна. Онцлог нь бага насны хүүхэдтэй амьдардаг насанд хүрсэн хүний амьдрах орчин нөхцөл ямар байвал зохих талаар интерьерийн шийдлийг харуулж өгөхийг зорьжээ.

Үүний тулд 2 том цонхыг /ийм давчуу зайд ганц чимэг нь болж буй/ ашигласны дээр хуучин ванны өрөө байсан хэсэгт булан хийж өгсөн байна. Үүний хажууд шалны түвшнээс 1 м 10 см өндөртэй ор байруулжээ.

Ийнхүү орны дор угаалгын машинаа байруулахын хамт эд бараагаа хадгалах орон зай бий болно. Орон зай хангалтгүй байсны улмаас шүршүүр шууд харагдахаар хийгдсэн байна. Түүнийг зөвхөн хөшиг л хааж байгаа юм.

Гоё шийдэж өгсөн зүйл гэвэл "өрөө" болгоныг тусгаарласан хана юм. Гал тогоо, ажлын ширээ, зарим онцгой тохиолдолд хүн унтаж буй хэсгийг хаах хаалт ч болохоор зохион байгуулсан. Ширээ зассан үед 4 хүн зэрэг суун хооллож болохоор бөгөөд ердийн үед хүүхэд хичээлээ хийх ширээ болгон ашиглаж болно.

Энэ бүхнийг хийхэд фанер, гипсэн хавтан, тосон будаг /шүршүүрт/ зэргийг ашиглажээ.

Барилга.МН

Э.Алтангэрэл