“Хашаа-2” арга хэмжээний хүрээнд нийслэлд зөвшөөрөлгүй барьсан гарааш, чингэлэг, нийтийн эзэмшлийн зам талбайг хаасан хашаа, хайс зэрэг 273 байршилд 1535 зөрчил илрүүлжээ.

 

Дээрх зөрчлийг арилгахад зургаан дүүргийн хэмжээнд 46 гаруй сая төгрөг зарцуулж, буруутай этгээдээр таван сая гаруй төгрөгийг нөхөн төлүүлсэн байна. Улаанбаатар хотын гудамж талбайн тохижилтыг сайжруулах, эрх бүхий байгууллага, албан тушаалтны зөвшөөрөлгүй барьсан хашаа, ТҮЦ, чингэлэг, хайсыг цэгцлэх зорилгоор “Хашаа-2” нэгдсэн арга хэмжээг зохион явуулж байгаа юм

.

Энэ ажлын хүрээнд дүүрэг тус бүрийн Засаг даргын орлогчоор ахлуулсан дэд ажлын хэсэг байгуулагдан зам талбай, орц гарцыг хааж барьсан зөвшөөрөлгүй хайс, хашааг буулгаж зөрчлийг арилгуулж байна. Мөн газар эзэмших, ашиглах зөвшөөрөлтэй боловч хуульд заасан хугацаанд барилгын ажлаа эхлээгүй иргэн, аж ахуйн нэгжийн судалгааг гарган фото зургаар баримтжуулан, зөрчил арилгахад зарцуулах зардал, төсвийг тооцон гаргажээ. Түүнчлэн нүүлгэн шилжүүлэхэд оршин суугчдын эсэргүүцэлтэй тулгарсан тул Нийслэлийн Засаг даргын орлогч Б.Мөнхбаатар, Нийслэлийн газрын албаны дарга Ц.Сундуй, дэд дарга Ц.Төрхүү нар Чингэлтэй, Баянзүрх, Баянгол дүүргийн нийт зургаан байршил бүхий газар очиж газар чөлөөлөхийг мэдэгдсэн байна. Цаашид графикийн дагуу газар чөлөөлөх, нүүлгэн шилжүүлэх, чөлөөлсөн байршилд цэвэрлэгээ хийх, замын тохижилтын зураг боловсруулах, авто замын урсгалыг зохицуулах ажлыг хийж, тэмдэгжүүлэн хэвшүүлэх гэнэ.

 

Монцамэ