Монгол Улсын Засгийн газар, Дэлхийн банк, Европын холбоо, Япон улсын Засгийн газраас хэрэгжүүлж буй “Тогтвортой амьжиргаа-2” төслөөс Газрын харилцаа, барилга, геодези, зураг зүйн газар (ГХБГЗЗГ) -т орчин үеийн багаж, тоног төхөөрөмжүүдийг хүлээлгэн өглөө.

 

Тус төслөөс 21 аймгийн газрын харилцаа хот байгуулалтын газарт газрын зураг хэвлэдэг машин, 329 суманд байршил хэмжигч GPS багаж нийлүүлэв. Тоног төхөөрөмжийг хүлээлгэн өгөх ёслолын арга хэмжээ уржигдар ГХБГЗЗГ-т болж, Дэлхийн банкны зөвлөх “Тогтвортой амьжиргаа-2” төслийн багийн ахлагч Эндрю Гүүдланд, ГХБГЗЗГ-ын дарга Ш.Батсүх болон албаны бусад хүмүүс оролцсон.

 

Энэ үеэр ГХБГЗЗГ-ын дарга Ш.Батсүх, орон нутгийн газрын харилцааны салбарыг орчин үеийн программ хангамж, тоног төхөөрөмжөөр хангасан нь газрын харилцааны салбарт технологийн шинжтэй өөрчлөлт хийхэд чухал ач холбогдол үзүүлнэ гэдэгт найдаж буйгаа илэрхийлсэн юм. Аймаг, сумдын газрын албаныхан газар зүйн мэдээллийн “GIS” программ болон дээрх тоног төхөөрөмжүүдийн тусламжтайгаар хэмжилтээ хийж, газар зохион байгуулалтын төлөвлөлтөө зурагжуулж, газар дээр нь иргэдэд танилцуулан санал бодлыг нь тусгах боломжтой болж байна. Өөрөөр хэлбэл, орон нутгийн газрын албад иргэдийн оролцоотой шийдвэрээ гаргаж, ил тод, шуурхай үйлчилнэ гэсэн үг. Орон нутгийн газрын албад өмнө нь тоног төхөөрөмж хангалтгүй байснаас нарийн зураглал явуулах боломжгүй байсан бол цаашид хиймэл дагуулаас мэдээлэл авч газрын байршлыг обьект бүрээр нь тодорхойлж, газар зохион байгуулалтын төлөвлөгөөг зураглах боломжтой боллоо.