Баянзүрх дүүрэгт Монгол Зөвлөлтийн найрамдалт харилцааны нотолгоо болсон цөөнгүй дурсгалт зүйлс, байшин барилга тэр бүү хэл орон сууцны хороолол ч байдаг. Эдгээрийн нэг бол “Монгол ард” Эскадрилын хөшөө юм. Баянзүрх дүүргийн 13-р хорооны нутаг дэвсгэр буюу Батлан хамгаалах яамны урд Монгол Зөвлөлтийн ард түмний найрамдал нөхөрлөлийн бэлгэ тэмдэг, агуу их түүхийг өгүүлэх Эскадрилин хөшөө сүндэрлэж байдаг. Дэлхийн II дайны үед Зөвлөлтийн улаан армид зориулан Монголын ард түмний тусламжаар байгуулж бэлэглэж байсан “ Монгол ард” нисэх онгоцны сумангийн дайчин гавъяаг мөнхлөн үлдээсэн уг хөшөөг агуу их ялалтын 40 жилийн ойгоор 1985 онд ардын армийн 165-р ангийн инженер техникийн ажилтан, ажилчид ур ухаанаа шингээн босгож байсан түүхтэй. Уг хөшөө нь Монголд анх удаа нисэх онгоц буусан газрын талбай дээр сүндэрлэж байдаг цэлмэг  тэнгэр  өөд тэмүүлж буй 3 онгоц бүхий хөшөөг 1985 оны 8 дугаар сарын 30-нд нээжээ. Уг дурсгалын хөшөөний зураг төслийг ЗХУ-ын архитекторч Л. К Медянов хийж байсан түүхтэй аж.

Цагийн эрхээр хуучирч муудсан уг хөшөөг иргэд хөдөлмөрчдийн амарч зугаалах таатай бүс болгох ажлыг  дүүргийн Засаг даргын тамгын газраас санаачлан хийжээ. Хөшөө боссон цагаас хойш 25 жилийн нүүрийг үзсэн хэдий ч бүрэн хэмжээний засвар хийж байгаагүй бөгөөд энэ жил нийслэл, дүүргийн хөрөнгө оруулалтаар 42 сая төгрөгийн төсөвтэйгээр сэргээн засварласан байна.   Искадрелтийн хөшөөний засвар, тохижилтын ажил нь 6 сарын 25- наас эхэлсэн бөгөөд тохижилтын ажлын хүрээнд 2188 м2 талбайг зүлэгжүүлэн, мод бут тарьж, том жижиг 15 парожектор хийн хөшөөний эргэн тойрныг гэрэлтүүлэн, хөөрч буй онгоцны утааг дүрслэн нэмэлт гэрэлтүүлэг суурьлуулсан байна. Хөшөөг тойруулан Монгол-Орос улс, нийслэл-дүүргийн далбааг суурилуулжээ.
Хөшөөний шинэчлэлийн нээлтийн ажиллагаанд дүүргийн Засаг дарга Б.Батзориг, Засаг даргын Тамгын газар, хорооны иргэд оролцсон юм. Цаашид хөшөөний эргэн тойронд цэцгийн мандал, усан оргилуур хийхээр төлөвлөж байгаа юм байна.