Хүүхдийн паркийг Диснейлэнд болгож энэ сарын 8-нд ашиглалтад оруулна гэсэн удирдлагуудынх нь амлалт талаар болж, бяцхан иргэд цоожтой хаалга мөргөснөөс хойш багагүй хугацаа өнгөрч байна.

Эцэг, эхчүүд шүүмжлэл өрнүүлж, сонин хэвлэлийнхэн сэдэв хөндөж, Хотын дарга өөрийн биеэр очиж үүрэг өгсөн ч Хүүхдийн паркийн төслийн удирдагч, дэд захирал Б.Батнягт огтхон ч  тоосонгүй.

Хүүхдүүдэд үлгэр ярьж байгаа юм шиг сайхан амлалтуудаар амыг нь таглаад буцаасан. Тиймээс хотын даргад хүргэх хов байгааг дуулгая. Нөгөө талаар иргэдийн дотор яригдаж буй мэдээллийг шалгаад үзэхэд гэмгүйг бас сануулъя.

Өнөөдөр хүүхдийн паркийн эзэмшил газар буюу тохижуулах ёстой талбайн дөнгөж 4/1-т нь л арав гаруй тоглоом суурилуулжээ. Усан оргилуур, цэцгийн мандал байгуулах хэсэгт улаан шороо манарч байгаагаас бус бүтээн байгуулалт хийгдсэнгүй. Яагаад ийм байдалтай байгаа нь хэл ам намжихийг хүлээсэн хүлээлт үү, хөрөнгө мөнгөгүй болсноос үүдэлтэй гацаа юу, тоног төхөөрөмж нь орж ирэхгүй байна уу гэдэг тодорхойгүй.

Тиймээс Хүүхдийн паркийн эзэмшил газрын 4/1-ээс бусад хэсгийг яагаад ашиглахгүй байлгаад байна, арай зарах гэж байгаа юм биш биз гэсэн хардлага иргэдэд байгаа. Урагшаа сунасан хот төлөвлөлт, Богд уул руу шаталсан байдлаар нүүж буй нийслэлийнхний амьдрал, Зайсангийн амыг тэр чигээр нь  орон сууцаар дүүргэх гэсэн юм шиг барилгын компаниудын уралдаан үүнд ташуур өгч байгаа юм. Мөн Хүүхдийн паркийн хашаан дотор зочид буудал, цэнгээний газар баригдаж байна гэсэн мэдээлэл ч гарч байсан удаатай.

Хүүхдийн паркийг сурвалжлах, олон нийтэд бодитой мэдээлэл хүргэх гэсэн хэвлэл, мэдээллийнхийг очиход дэд захирал Б.Батнягтаас үүрэг хүлээсэн хүмүүс угтан авч, тархийг нь угаагаад буцаадаг гэсэн яриа, хөөрөө ажилчдынх нь дотор өрнөдөг. Үнэхээр үүдний жижүүр гаднаас очсон хэнийг ч хаанаас яваа хэн болохыг асууж, цааш нь мессэж бичин ирсэн хариуг нь дуржигнуулж байгаагийн ард удирдлагууд нэртэй удирдаачид сууж байдаг нь тодорхой.

Хөрөнгө мөнгөний хувьд эхний ээлжинд тохижуулах ёстой талбайд зарцуулагдах 31 тэрбум төгрөгөөс  өнөөдрийн байдлаар 20 орчмыг нь л гаргаад байгаа аж. Одоо суурилуулсан 12 тоглоом дээр шинийг нэмж, нийтдээ 50 орчмыг бий болгоно хэмээн тэд ярьж байгаа юм.

Цаашид хүүхдийн паркийн ажил хэрхэн өрнөх нь анхаарал татсан сэдвийн нэг. “Удахгүй, дуусна”, “Хичээж л байна”, “Зүтгээд л байна” гэдэг үг бол тэдний аман дээр байдаг жижүүрийн үг. Бодит байдал дээр өөр юм. Тус газрын удирдлагууд ажил явуулж байгаа мэтээр харагдуулж, цаг хожихыг урьтал болгож байгаагаас  бус бүтээн байгуулалтад санаа тавихгүй байна гэсэн мэдээлэл дуулддаг. “Хүүхдийн паркт ажилтан шалгаруулж авна”, “Тоног төхөөрөмж суурилуулахад мэргэжлийн хүн авна” гэсэн зарыг сонин, хэвлэлээр тараасаар хоёр жилийн нүүр үзсэн нь ажил явуулж буй мэтээр харагдуулж, нэг ёсондоо имиж бүрдүүлсэн жүжиг гэж үзэх хүн цөөнгүй байна. Зарын дагуу ажилтан шалгаруулж авдаггүй нь ч үүний нотолгоо гэлцдэг.

Паркийн төслийн удирдлагууд ажилтан шалгаруулж авах бүү хэл, мөнгө, төгрөгнөөс үүдэн дотроо  “байлдаж” бие, биеэ ажлаас халсан, халаа сэлгээний асуудал бийг зарим эх сурвалж хэлдэг. Паркаа барьж эхлээ ч үгүй байж бялуу хуваахаас үүдэн албан тушаалын хэрүүл, сонгон шалгаруулалтын будлианаар хүүхдийн гэх тодотголтой энэ газрыг “бузарлаж” буй эрхмүүд хөрөнгө мөнгө идэж шамшигдуулах нь ч яахав, арай газрыг нь зараад идчих юм биш биз.