НИТХ-ын тэргүүлэгчид 2005 оноос хойш мөрдөж буй газрын үнэлгээний бүсчлэлийн хил хязгаарыг тэлэн өөрчилж, төлбөрийн хэмжээнд өөрчлөлт орууллаа.

 

Газрын үнэлгээний бүсчлэлийн хил хязгаарт нийт нутаг дэвсгэрээ таван бүсэд хуваажээ. Дүүрэг хороодын хил, ундны усны хамгаалалтын 1, 2 дугаар мужийн хил, Богдхан уул, Хан Хэнтийн тусгай хамгаалалттай газар нутгийн хил зэрэг зургийг координатын нэг системд байршуулан дүүрэг тус бүрээр шинэчлэн тогтоов. Баянзүрх дүүрэгт нэгдүгээр бүс буюу 1027,8 га талбай хамрагдсан бол Баянголд 967,6, Сүхбаатарт 606,4, Сонгинохайрханд 339,5, Хан-Уулд 1293,3, Чингэлтэй 200,9 га талбай тус тус багтжээ.

Нэгдүгээр бүсэд хуучин бүсчлэлээр 3930,8 га талбай ногддог байсныг 4435,5 болгож 504,7 га талбайд өөрчлөлт оруулсан аж. Хоёрдугаар бүсийг 3004,4, гурав нь 73501,4, дөрөв 109597,4, тав нь 273545,9 га талбайгаар шинэчлэн тогтоолоо. Түүнчлэн, нийтийн эзэмшлийн газарт үйл ажиллагаа явуулж буй байгууллага, аж ахуйн нэгж, иргэдээс газар эзэмшиж, ашигласны төлбөрийг одоо мөрдөгдөж байгаа төлбөрийн дээд хэмжээгээр буюу метр кв газарт cap бүр 440 төгрөг байхаар тогтоож төсөвт төвлөрүүлэх юм. Газар дээрээ гэрээнд заасан нөхцөлийн дагуу барилга байгууламж барьж үйл ажиллагаа явуулаагүй байгаа газар эзэмшигч, ашиглагчийн газрын эрхийг өөр этгээдэд шилжүүлэх тохиолдолд метр кв газрын суурь үнэ болох 8800 төгрөгийг 1-3 дахин нэмж төлбөр ногдуудуулахаар болжээ.