1921 оны ардын хувьсгал ялсны дараа Ардын засгийн газраас улс орноо соёл иргэншлийн шинэ замд оруулах зорилтоо хэрэгжүүлэхэд улс ардын салбарыг цоо шинээр эхлэх хэрэгтэй байсан бөгөөд тэр бүхний эхлэл нь барилга байв. Тухайн үед сүм хийдийн барилга байгууламжийг барьж босгох ажлыг гадаадын пүүс худалдаачид гүйцэтгэдэг, тэд нь хэрэгцээндээ тохируулан гар аргаар шохой хатаах,тоосго цохих гэх мэт ганц нэг жижиг үйлдвэрлэлийг явуулахаас хэтрэхгүй, барилгын үйлдвэрлэлийн өөр ямар ч бааз суурь Монголд байсангүй.

1925 онд барилгын ажлыг улсын хяналтад авч энэ дагуу Аж ахуйн явдлын яам, харилцан туслалцах хоршоолол, Монгол Банкийг түшиглэн “Монголын хувь нийлүүлсэн хоршоог”-г буман төгрөгийн хөрөнгөтэйгээр байгуулсан нь Монголын барилгын үүсэл байв.

1926 оны аравдугаар сард хуралдсан Ардын Засгийн газрын хурлын 40-р тогтоолоор Аж ахуйн явдлын яамны дэргэд “Барилгын хэлтэс” байгуулж барилга барих, барилгын материал үйлдвэрлэх, зураг төсөл зохиох ажлыг эхлүүлсэн байна.

1927 онд аж хауйн тооцооны үндсэн дээр ажиллах зураг төслийн контор байгуулж ЗХУ-аас мэргэжилтэн авчирч ажиллуулжээ.Энэ үед улсын хэмжээгээр барилгажилтын ажил эрчимжсэн учир Засгийн газрын 1992 оны 18-р тогтоолоор “Барилгын инженер техник чанарын товчоон” байгуулж барилга, архитектурын төрөл бүрийн зураг төсөл боловсруулах, архитектур хот төлөвлөлтийн ажлыг гардан гүйцэтгэх болсон байна.

Барилгын үүсэл хөгжлийг үечлэн авч үзвэл эхний шат буюу 1926 -1930 он барилгын байгууллага цогцоороо үүсэн бий болсон жилүүд байлаа. Энэ үед Аж үйлдвэрийн комбинатын барилга дээр ЗХУ-ын мэргэжилтнүүд монгол ажилчдыг сургахын зэрэгцээ 130-аад хүнийг зөвлөлтөд сургав. Энэ мэт ажлын үр дүнд үндэсний барилгачид бий болж эхэлжээ.

Үүний дараа 1931-1945 онд барилга улс ардын аж ахуйн салбар болж хөгжив.1946-1965 он барилгын салбарын хувьд их бүтээн байгуулалтын үе байв.1965-1989 он барилгын материал техникийн бааз суурь бэхжсэн,улс ардын аж ахуйн тэргүүлэх салбар боллоо. 1980-1990 оны үе нь Монголын барилгын байгууллагуудын хөгжлийн оргил үе байсан бөгөөд жилдээ 5000 м квадрат хүртэл талбайтай орчин үеийн тохилог орон сууц, олон үйлдвэр, барилгуудыг ашиглалтад өгсөн байна. Харин 1991-1995 он барилгын салбарын үйл ажиллагаа үндсэндээ зогсолтод орсон үе байв. 1996 оноос барилгын үйлдвэрлэл сэргэх хандлагатай болж хувийн хөрөнгө оруулалттай контор,үйлчилгээний зориулалттай жижиг барилгуудыг барих болсон юм.