Нийслэлийн ерөнхий менежерийн багцад орон сууцны дээврийг нь солих ажил тусгагджээ. Ажлын хэсгийнхэн есөн дүүрэгт сонголт хийж 2007 оны долдугаар сараас өмнө 55 байшингийн дээврийг солихоор болсон байна.

Улаанбаатар хотод дээврийн засварын ажил хийгдэх 800-гаад барилга байдаг аж. Үүнээс 175 барилгад эхний ээлжинд засвар хийх шаардлагатай гэсэн Мэргэжлийн хяналтын газрын дүгнэлт бий.  “Нэг амьсгаагаар шийдчих асуудал биш учраас жил бүр тодорхой хуваарь гаргаж гүйцэтгэдэг. Үүнийг хүмүүс зөвөөр ойлгоосой” хэмээн мэргэжлийн хүн ярьсан. Энэ удаагийн шалгаруулалтад нийслэлийн захын хорооллууд түлхүү хамрагджээ. Засварыг 12 компани гүйцэтгэхээр болсон байна. Дээвэр засч байгаа гэнэ ээ хэмээн харж суухын оронд иргэд, аж ахуйн нэгжүүд өөрсдөө хяналттай байж чадвал энэ ажил илүү чанаржих нь ойлгомжтой.

Орон сууцанд амьдарч байгаа иргэдэд ийм зовлон байдаг бол гэр хорооллын зарим хэсгийнхэнд цахилгааны асуудал тулгардаг. Шилжилт хөдөлгөөн ихэссэн, хөдөөнөөс хотыг зорих урсгал нэмэгдэж байгаагаас гэр хороолол тэлсээр байгаа. Хөдөө ч ийм байхгүй хэмээн зарим нь гомдоллодог. Энэ асуудлыг шийдэхэд багагүй хөрөнгө зарцуулдаг аж.

Засгийн газрын 2006 оны тавдугаар сарын 31-ны 23 дугаар хуралдаанаар цахилгаангүй айлуудыг цахилгаанаар хангахад 2.8 тэрбум төгрөг зарцуулахаар болжээ. “Улаанбаатар цахилгаан түгээх сүлжээ” компани Баянгол, Сонгинохайрхан, Баянгол дүүргийг, хотын төсвөөс Баянзүрх, Чингэлтэй, Сүхбаатар дүүргийг цахилгаанаар хангахаар болжээ. Улаанбаатар цахилгаан түгээх компани зээлийн хөрөнгөөр ажлаа хийж дуусгасан бол хот энэ жилийн төсөвт суутгуулж, ажлаа эхлээд байгаа юм.