Уг салбарыг дэмжихийн тулд хялбарчилсан системтэй болгох шаардлагатай. Ганшуун Сухайт-Сэкэ чиглэлийн хилийн боомтод мөн л дүрэм журмаа шинэчлэх шаардлага байгаа аж. Жишээ нь улирал бүрийн эхний 20 хоногт нээгддэг Гашуун Сухайтын хилээр гарах нь зөвхөн хятад, монгол хүмүүст боломжтой. Бүх гадаад мэргэжилтэн дээрх хугацаанаас хойш Улаанбаатараар дамжин очих хэрэгтэй болдог. Иймд монголын өмнөд бүсийн уул уурхайг хөгжүүлэхэд энэ систем тохиромжгүй байгаа юм.

Түүнчлэн, 2007 онд боловсруулсан Авто замын мастер төлөвлөгөөнд монголын өмнөд бүсэд хэд хэдэн сайжруулсан авто зам барих төлөвлөгөө тусгасан байгаа. Шинэ авто замын барилгыг уул уурхайн компаниуд хөрөнгө гаргаж хийвэл дэмжин ажиллах талаар тусгасан бөгөөд зам барьсны дараа улсад өгвөл төлбөртэй болгож, зардлыг нь олох боломжтой. Уг төлөвлөгөөнд Даланзадгадаас Нарийн сухайт хүрэх авто замыг оруулаагүй шалтгааныг дахин хянаж үзэх хэрэгтэйг монголын өмнөд бүсийн дэд бүтцийн стратеги тайланд онцолсон байна. Нарийн Сухайтын уурхайнууд ханган нийлүүлэлтээ төвөөсөө авахаар байгаа, үйлдвэрлэл, үйлчилгээний төвийг Таван толгой ойролцоо эсвэл Даланзадгад хотод байгуулах боломжтой. Сайжруулсан замыг уурхайн ханган нийлүүлэлт, ажилчдад зориулж барих нь зүйтэй юм. Энэ чиглэлийн сайжруулсан авто зам барих зардлыг 85 сая ам доллар гэж тооцжээ.