Аюултай бүсийн айлуудыг үнэгүй нүүлгэж цахилгаанаар хангана
Barilga
2019-11-05
үнэ төлбөргүй нүүн аюулгүй, зөвшөөрөгдсөн бүсэд суурьших нэг удаагийн боломж олдож байна.
Захирагчийн ажлын албанаас гаргасан мэдээгээр нийслэлийн гэр хорооллуудад цахилгаанаар хангагдаагүй 2000 гаруй айл өрх бий бөгөөд зөвшөөрөлгүй газарт буусан иргэдийг оролцуулбал 5000 шахам айл өрх харанхуй байгаа аж.
Эдгээр айл өрхийг цахилгаан эрчим хүчээр хангах ажилд найман тэрбум төгрөг зарцуулахаар төсвийн тодотголоор баталж өгсөн. Гэхдээ энэхүү ажлыг хийхдээ зөвшөөрөлгүй газарт, аюултай бүсэд байгаа иргэдийг тогтоосон бүсэд нүүлгэн шилжүүлж, цахилгаан эрчим хүчний асуудлыг шийдвэрлэх нь зүйтэй гэж хотын удирдлагууд үзэж байгаа юм.
«Энэ бол тэдэнд олдож буй алтан боломж гэдгийг сайн ойлгуулах хэрэгтэй. Дахиж бидэнд ингэж их хөрөнгө гарган шийдвэрлэх боломж байхгүй» хэмээн хотын мээр цохон тэмдэглээд дүүргийн удирдлагуудыг аль дүүрэгт хэнийх өндөр хүчдэлийн дор, үерийн аман дээр байгаа, түүнийг яаж шийдэхийг Ерөнхий менежерийн хамт шийдвэрлэхийг үүрэг болголоо.
Монцамэ