Энэ ч үүднээс Засгийн газраас VII хорооллын шав тавьсан.

Харин иргэдээс газрыг нь хэрхэн авах талаар багагүй санал, шүүмж нийгэмд өрнөж байлаа. Зарим хүн энэ байдлыг эртнээс анзаарч ашигтай байрлалтай гэж үзсэн газрыг иргэдээс үнэ цохин худалдаж авч эхэлсэн. Тухайн үед газрыг нэг метр квадратыг нь 150-200 ам.доллараар үнэлсэн ч одоогийн ханштай харьцуулахад энэ нь тун бага байв. VII хорооллын шав тавих үед холбогдох хүмүүсээс иргэдээс газрыг хэрхэн авах талаар тодруулахад "Шав тавих ёслол дууссаны дараа айлуудаар явна" гэж хариулж байсан. Өөрөөр хэлбэл, иргэдээс газрыг нь авахад бэрхшээл үүсэхгүй хэмээн ойлгож байсан бололтой. Харамсалтай нь газар тойрсон олон бэрхшээл ундраад байна.

Сүүлийн хэдэн сарын хугацаанд сонгуулийн уур амьсгал давамгайлж дээрх асуудал дарагдах аястай болов. VII хороолол баригдах газар оршин сууж буй иргэдтэй уулзлаа.

Газраа чөлөөлөх сонирхолгүй иргэд цөөнгүй байв. Энэ нь хэд хэдэн шалтгаантай. Тэр хавиар автомашин засвар, барилгын материалын худалдаа эрхлэн, дэлгүүр ажиллуулж амьжиргаагаа залгуулдаг иргэд олон. Тэд газраа зарах, байраар сольсон тохиолдолд яаж хоолоо олж идэх вэ хэмээн санаа зовинож байна. Нөгөөтэйгүүр, худалдаа үйлчилгээ эрхэлдэггүй ч газраа чөлөөлөх хүсэлгүй хүн байгаа аж. Хороолол босгох газар нийслэлийн төвд ойр тул ихэнх өрх хашаандаа айл буулгах, гэр, байшин хөлслүүлэх зэргээр тав гурван "цаас" олдог. Зарим нь хашаандаа үр хүүхэд, ах дүү, хамаатан саднаа буулгажээ. Тэд "Бид газраа зараад байранд орж болно. Гэхдээ гал голомтоо бадраасан үр хүүхдээ хаашаа нүү гэж хэлэх билээ" хэмээн ярьж байсан.

Газраа чөлөөлөх сонирхолгүй байгаагийн бас нэг шалтгаан нь иргэд байранд орсноор дулаан, цахилгаан, усны мөнгөө дийлэхгүй хэмээн үзэж буйтай холбоотой аж. Ер нь иргэдийн амьжиргааны түвшин доогуур тул газраа байраар солих сонирхол бага байсан.

Ямартай ч нийслэлийг утаанаас салгаж үерийн далан, уулын бэл гээд хаа сайгүй буугаад байгаа өрхүүдийн нягтралыг багасгахын тулд гэр хорооллыг барилгажуулах нь гарцаагүй. Гэхдээ иргэдийн өмч болсон газрыг хэрхэн авахыг нарийн зохицуулах шаардлагатай нь харагдаж байна. Тухайлбал, тухайн газар үйлчилгээ явуулдаг иргэдийн газрыг авахдаа шинэ хороолол баригдсаны дараа үйл ажиллагаагаа дахин явуулах боломжоор хангах талаар анхаарч болно.

Цаашид олон гэр хорооллыг барилгажуулна. Харин энэ мэт бэрхшээл ч үргэлжлэн гарахыг үгүйсгэхгүй. Иймд газрын хэрхэн солих, худалдан авах цаашлаад үйлчилгээ эрхэлдэг, томоохон объекттой газрыг ямар зохицуулалтаар авах талаар тодорхой журам боловсруулах шаардлагатай. Ингэхдээ газар өмчлөгчдийн байр суурь, санал бодлыг нухацтай авч үзэх нь чухал. Саалиа бэлдэхээс өмнө саваа бэлд хэмээх ухаант ардын үг бий. Гэр хорооллыг орон сууцаар солих зөв ч газрыг хэрхэн авах асуудлыг орхигдуулж болохгүй. Зохицуулалт байхгүйгээс зарим иргэн хохирч байгаа нь нууц биш.

gerhoroolol.blog.gogo.mn